MATTHÉÜS 14

₁EN in daardie tyd het Herodes, die viervors, die gerug van Jesus gehoor

₂en aan sy knegte gesê: Hierdie man is Johannes die Doper. Hy het uit die dode opgestaan, en daarom werk dié kragte in hom.

₃Want Herodes het Johannes gevang, hom geboei en in die gevangenis gesit vanweë Heródias, die vrou van Filippus, sy broer.

₄Want Johannes het vir hom gesê: Dit is u nie geoorloof om haar te hê nie.

₅En hoewel hy hom wou doodmaak, het hy die skare gevrees, omdat hulle hom vir 'n profeet gehou het.

₆Maar by die viering van die verjaarsdag van Herodes het die dogter van Heródias voor hulle gedans en Herodes behaag.

₇Daarom het hy met 'n eed beloof om haar enigiets te gee wat sy sou vra.

₈Toe sê sy, nadat sy deur haar moeder aangehits was: Gee my hier op 'n skottel die hoof van Johannes die Doper.

₉En die koning het treurig geword, maar ter wille van die eed en die feesgenote het hy beveel dat dit gegee moes word.

₁₀En hy het gestuur en Johannes in die gevangenis onthoof.

₁₁Sy hoof is toe op 'n skottel gebring en aan die meisie gegee, en sy het dit na haar moeder gebring.

₁₂En sy dissipels het gekom en sy liggaam weggeneem en dit begrawe; en hulle het gegaan en dit aan Jesus vertel.

₁₃En toe Jesus dit hoor, het Hy daarvandaan in 'n skuit vertrek na 'n verlate plek alleen. En die skare het dit gehoor en Hom van die stede af te voet gevolg.

₁₄EN toe Jesus uitgaan, het Hy 'n groot skare gesien en innig jammer vir hulle gevoel, en Hy het hulle siekes gesond gemaak.

₁₅En toe dit aand geword het, kom sy dissipels na Hom en sê: Die plek is verlate, en dit is al oor die tyd; stuur die skare weg, sodat hulle na die dorpe kan gaan en vir hulle voedsel koop.

₁₆Maar Jesus sê vir hulle: Hulle hoef nie weg te gaan nie; gee julle vir hulle iets om te eet.

₁₇Maar hulle antwoord Hom: Ons het hier net vyf brode en twee visse.

₁₈En Hy sê: Bring dit hier vir My.

₁₉Toe gee Hy die skare bevel om op die gras te gaan sit; en Hy neem die vyf brode en die twee visse, kyk op na die hemel en dank; en nadat Hy die brode gebreek het, gee Hy dit aan die dissipels en die dissipels aan die skare.

₂₀En almal het geëet en versadig geword, en hulle het die oorskot van die brokstukke opgetel, twaalf mandjies vol.

₂₁En dit was omtrent vyfduisend manne wat geëet het, buiten die vroue en kinders.

₂₂EN Jesus het dadelik sy dissipels gedwing om in die skuit te gaan en voor Hom uit te vaar na die oorkant, terwyl Hy die skare wegstuur.

₂₃En nadat Hy die skare weggestuur het, klim Hy op die berg om in die eensaamheid te bid. En toe dit aand geword het, was Hy daar alleen.

₂₄En die skuit was al in die middel van die see, geteister deur die golwe; want die wind was teen hulle.

₂₅Maar in die vierde nagwaak het Jesus na hulle gekom, al wandelende op die see.

₂₆En toe die dissipels Hom op die see sien loop, word hulle ontsteld en sê: Dit is 'n spook! En hulle het geskreeu van vrees.

₂₇Maar Jesus het dadelik met hulle gespreek en gesê: Hou goeie moed, dit is Ek! Moenie vrees nie.

₂₈En Petrus antwoord Hom en sê: Here, as dit U is, beveel my om op die water na U te kom.

₂₉En Hy sê: Kom! Petrus klim toe van die skuit af en loop op die water om na Jesus te gaan.

₃₀Maar toe hy die sterk wind sien, het hy bang geword; en toe hy begin sink, roep hy uit en sê: Here, red my!

₃₁En Jesus het dadelik sy hand uitgesteek en hom gegryp en vir hom gesê: Kleingelowige, waarom het jy getwyfel?

₃₂Daarop klim hulle in die skuit, en die wind het gaan lê.

₃₃Toe kom die wat in die skuit was, en val voor Hom neer en sê: Waarlik, U is die Seun van God!

₃₄En hulle het oorgevaar en in die land Gennésaret gekom.

₃₅En die manne van daardie plek het Hom herken en in daardie hele omtrek uitgestuur en almal wat ongesteld was, na Hom gebring;

₃₆en hulle het Hom gesmeek dat hulle net maar die soom van sy kleed mag aanraak; en almal wat dit aangeraak het, het gesond geword.