Psalms 99

₁Die Here regeer –

laat die volke bewe!

Hy troon oor gerubs –

laat die wêreld sidder!

₂Die Here in Sion is groot,

verhewe is Hy bo al die volke.

₃Laat hulle u groot

en ontsagwekkende Naam prys

– “•Heilig is Hy!” –

₄en die krag van die Koning,

Hy wat die reg liefhet.

Dit is U wat billikheid,

reg en geregtigheid

gevestig het in Jakob;

U het dit gedoen.

₅Verheerlik die Here ons God,

buig in aanbidding

voor die voetbank vir sy voete:

“Heilig is Hy!”

₆Moses en Aäron

was onder sy priesters,

Samuel onder dié wat sy Naam

aangeroep het.

Wanneer hulle die Here aangeroep het,

het Hy self hulle geantwoord.

₇Uit 'n wolkkolom het Hy

met hulle gepraat.

Hulle het sy bepalings nagekom,

ook die vaste voorskrifte

wat Hy vir hulle gegee het.

₈Here, ons God, U self

het hulle geantwoord.

U was vir hulle 'n God wat vergewe,

maar ook Een wat hulle dade vergeld.

₉Verheerlik die Here, ons God,

buig in aanbidding voor sy heilige berg,

want heilig is die Here, ons God.