Psalms 96

₁Sing vir die Here 'n nuwe lied,

sing vir die Here, o ganse aarde!

₂Sing vir die Here, prys sy Naam,

verkondig sy verlossing

van dag tot dag.

₃Maak onder die nasies

sy majesteit bekend,

onder al die volke

sy wonderdade.

₄Want groot is die Here

en besonder lofwaardig;

Hy is ontsagwekkend, meer as alle gode.

₅Ja, al die gode van die volke

is niksbeduidend,

maar die Here

het die hemel gemaak.

₆Luister en glans

is voor Hom;

krag en heerlikheid

is in sy heiligdom.

₇Gee eer aan die Here,

familiegroepe van volke!

Gee eer aan die Here

vir sy heerlikheid en krag!

₈Gee eer aan die Here

vir die heerlikheid van sy Naam!

Bring dankbewyse

en gaan sy voorhowe binne.

₉Buig in aanbidding voor die Here

in sy glansryke heiligheid!

Bewe vanweë sy teenwoordigheid,

o ganse aarde!

₁₀Sê onder die nasies:

“Die Here regeer;

ja, die wêreld staan vas,

dit wankel nie.

Hy oordeel volke met billikheid.”

₁₁Laat die hemel bly wees,

en die aarde juig;

laat die see en alles daarin

dit uitbasuin.

₁₂Laat die veld en alles daarop

jubel;

dan sal alle bome in die bos

van vreugde uitroep

₁₃voor die Here.

Want Hy kom, ja, Hy kom

om die aarde te oordeel;

Hy sal die wêreld oordeel

in •geregtigheid,

en volke ooreenkomstig sy trou.