Psalms 88

₂Here, God wat my verlos,

bedags roep ek om hulp,

snags bly my hulpgeroep voor U.

₃Laat my gebed U bereik,

draai u oor na my klaagroep;

₄want ek het genoeg gehad van rampe.

My lewe is by die •doderyk;

₅ek word gereken by dié

wat afdaal in die put.

Ek het geword soos 'n sterk man

sonder krag,

₆vrygelaat onder die dooies,

soos gesneuweldes wat in 'n graf lê,

aan wie U nie meer dink nie;

hulle wat afgesny is van u hand.

₇U het my in die diepste put geplaas,

in donker plekke, in die dieptes.

₈U woede rus swaar op my;

met al u golwe onderdruk U my. •Sela

₉U het my bekendes van my verwyder,

U het my iets afstootliks gemaak

vir hulle.

Ek is opgesluit en kan nie uitkom nie;

₁₀my oë verdof van ellende.

Ek roep na U, Here, elke dag,

ek strek my handpalms na U uit.

₁₁Kan U aan dooies 'n wonder doen?

Of skimme, kan hulle opstaan,

kan hulle U prys? Sela

₁₂Word daar in die graf gepraat

oor u troue liefde,

oor u betroubaarheid

in die onderwêreld?

₁₃Is u wonders bekend in die duisternis,

en u geregtigheid in die land

van vergetelheid?

₁₄En ek, na U roep ek om hulp, Here,

elke oggend kom my gebed voor U.

₁₅Waarom, Here, verstoot U my,

verberg U u gesig vir my?

₁₆Ek is magteloos,

in doodsgevaar van my jeug af;

verslae dra ek u verskrikkinge.

₁₇Oor my het die gloed

van u toorn gebreek,

u verskrikkinge vernietig my.

₁₈Die hele dag omring dit my

soos water,

dit omsluit my heeltemal.

₁₉U het geliefdes en vriende

van my verwyder;

my vertroueling is die duisternis.