Psalms 76

₂God is in Juda bekend,

in Israel is sy Naam groot.

₃In Salem was sy hut,

sy skuilplek in Sion.

₄Daar het Hy brandpyle uit die boog,

skild en swaard en steekspies,

stukkend gebreek. •Sela

₅Stralend was U,

magtiger as die berge

wat die prooi moes wees.

₆Dié met dapper harte

het self die buit geword;

hulle het die ewige slaap ingegaan.

Nie een van die bekwame manne

kon 'n hand lig nie.

₇Vanweë u dreiging, o God van Jakob,

het die bemanning van

strydwaens en die perde

in 'n beswyming geraak.

₈U – ontsagwekkend is U!

Wie kan voor U bly staan

wanneer U toornig is?

₉Uit die hemel het U die oordeel

aangekondig.

Die aarde het gevrees en stil geword

₁₀toe God opstaan

om die vonnis te vel,

om al die verdruktes

van die land te verlos. Sela

₁₁Ja, die woede teen mense

strek U tot lof;

met die oorblyfsel van die

woedebuie omgord U Uself.

₁₂Lê geloftes af aan die Here julle

God, en kom dit na.

Almal wat rondom Hom is,

moet geskenke bring

vir die Ontsagwekkende.

₁₃Hy ontneem •leiers die moed –

Hy wat vreesaanjaend is

vir die konings van die aarde.