Psalms 48

₂Groot is die Here

en besonder lofwaardig

in die stad van ons God,

sy •heilige berg.

₃Indrukwekkend hoog,

'n vreugde vir die hele land

is die berg Sion in die verre

noorde van die stad van die groot Koning.

₄God is in die vestings van die stad.

Hy is bekend as 'n toevlugsoord.

₅Want kyk, die konings

het byeengekom,

hulle het saam opgetrek.

₆Die oomblik toe hulle dit sien,

was hulle stomgeslaan;

verskrik het hulle op die vlug geslaan.

₇Vrees het hulle daar beetgepak,

angs, soos 'n vrou wat geboorte gee.

₈Met 'n oostewind het U

handelskepe stukkend gebreek.

₉Wat ons gehoor het,

het ons ook ervaar

in die stad van die Here,

Heerser oor alle magte,

in die stad van ons God:

God het haar gevestig vir altyd. •Sela

₁₀In u •tempel, o God,

dink ons na oor u troue liefde.

₁₁Soos u Naam, o God,

so strek u lof tot aan die eindes

van die aarde,

u regterhand is vol •geregtigheid.

₁₂Die berg Sion is verheug,

die dogters van Juda juig

oor u beslissings.

₁₃Loop rondom Sion,

gaan reg rondom haar;

tel haar torings,

₁₄kyk goed na haar verdedigingswal,

bekyk haar vesting,

sodat julle dit vir die

toekomstige geslag kan vertel:

₁₅Ja, hierdie God is ons God

vir altyd en ewig;

Hý sal ons lei vir ewig.