Psalms 135

₁Halleluja!

Loof die Naam van die Here!

Loof Hom, diensknegte

van die Here,

₂wat diens verrig

in die huis van die Here,

in die voorhowe van die huis

van ons God.

₃Loof die Here,

want die Here is goed;

besing sy Naam, want dit is lieflik;

₄want die Here het Jakob

vir Hom uitgekies,

Israel as sy persoonlike eiendom.

₅Ja, ek, ek weet

dat die Here groot is,

dat ons Heer groter is

as al die gode.

₆Alles wat die Here behaag,

doen Hy in die hemel

en op die aarde,

in die oseane en alle dieptes.

₇Hy laat stapelwolke opstyg

aan die einde van die aarde;

Hy maak weerligstrale vir die reën;

Hy laat die wind

uit sy voorraadkamers vry;

₈Hy wat die •eersgeborenes van Egipte,

van mense en diere, getref het.

₉Hy het tekens en wonders

in jou midde verrig, Egipte,

teen die farao en al sy amptenare,

₁₀Hy wat baie nasies getref

en magtige konings

om die lewe gebring het:

₁₁Sihon, die koning

van die Amoriete,

Og, die koning van Basan

en al die konings van Kanaän.

₁₂En Hy het hulle land as erfdeel gegee,

as 'n erfdeel aan Israel, sy volk.

₁₃Here, u Naam is vir ewig;

Here, u gevierde Naam duur

van geslag tot geslag.

₁₄Want die Here laat reg geskied

aan sy volk;

oor sy diensknegte ontferm Hy Hom.

₁₅Die afgode van die nasies

is silwer en goud,

die werk van mensehande.

₁₆Hulle het monde,

maar kan nie praat nie,

oë, maar kan nie sien nie.

₁₇Hulle het ore,

maar kan nie hoor nie;

daar is ook glad nie asem

in hulle monde nie.

₁₈Hulle makers

sal net soos hulle word –

elkeen wat op hulle vertrou.

₁₉Huis van Israel, prys die Here!

Huis van Aäron, prys die Here!

₂₀Huis van Levi, prys die Here!

Wie vir die Here ontsag het,

prys die Here!

₂₁Die Here moet geprys word uit Sion,

Hy wat in Jerusalem woon.

Halleluja!