Psalms 129

Van my jeug af het hulle my

dikwels aangeval

– laat Israel dit sê –

₂van my jeug af het hulle my

dikwels aangeval,

tog kon hulle nie oor my

die oorhand kry nie.

₃Ploeërs het oor my rug geploeg,

hulle ploegvore lank getrek;

₄maar die Here is regverdig –

Hy het die goddeloses se toue

stukkend gesny.

₅Mag almal wat Sion haat,

beskaamd staan en terugdeins.

₆Mag hulle wees soos gras op dakke,

wat verdroog voordat

dit uitgetrek word,

₇wat nooit die handpalm vul

van een wat oes,

of die vou van die kleed

van een wat gerwe bind nie.

₈En mag verbygangers nie sê nie:

“Die seën van die Here vir julle;

ons seën julle in die Naam van die Here.”