Psalms 112

₁Halleluja!

Gelukkig is die mens

wat ontsag het vir die Here,

wat groot vreugde vind in sy gebooie.

₂Sy nageslag sal magtig wees

in die land –

'n geslag opregtes wat geseën word.

₃Oorvloed en rykdom is in sy huis,

en sy geregtigheid hou stand vir altyd.

₄Hy skyn in die duisternis

as 'n lig vir die opregtes;

hy is genadig, barmhartig en regverdig.

₅Dit gaan goed met 'n mens

wat goedhartig is en uitleen,

wat sy sake eerlik bestuur;

₆want hy sal nooit wankel nie.

'n Regverdige bly vir altyd

in die herinnering.

₇Vir slegte tyding is hy nie bang nie;

sy hart is standvastig

in vertroue op die Here.

₈Sy hart is bestendig,

hy is nie bang nie;

uiteindelik sien hy neer

op sy teenstanders.

₉Hy deel uit, hy gee aan behoeftiges;

sy geregtigheid hou stand vir altyd;

met waardigheid styg sy aansien.

₁₀Die goddelose sien dit

en vererg hom;

hy kners op sy tande,

maar kwyn weg.

Die begeerte van goddeloses

gaan tot niet.