Psalms 119

₁Gelukkig is mense

wie se lewenspad onberispelik is

en wat die wet van die Here volg!

₂Gelukkig is hulle

wat hou by sy bepalings,

wat Hom met hulle hele hart soek;

₃wat ook nie onreg pleeg nie,

maar net sy paaie volg!

₄U het self u opdragte gegee,

sodat mense dit noukeurig sal nakom.

₅Ag, was my lewenspaaie maar standvastig,

sodat ek u voorskrifte kon nakom.

₆Dan sal ek nie beskaamd staan,

terwyl ek op al u bevele let nie.

₇Ek prys U met 'n opregte hart

terwyl ek u regverdige beslissings bestudeer.

₈U voorskrifte sal ek nakom;

moet my tog nooit in die steek laat nie.

₉Hoe sal 'n jongmens sy lewenspad

suiwer hou?

Deur te hou by u woord.

₁₀Met my hele hart soek ek U;

laat my tog nie afdwaal van u bevele nie.

₁₁In my hart koester ek u woord,

sodat ek nie teen U sondig nie.

₁₂U moet geprys word, Here!

Leer my u voorskrifte!

₁₃Met my lippe vertel ek van al

die beslissings van u mond.

₁₄Oor die pad van u bepalings

is ek verheug

soos oor enige rykdom.

₁₅Oor u opdragte wil ek nadink;

ek wil op u paaie let.

₁₆In u voorskrifte vind ek vreugde;

ek sal u woord nie vergeet nie.

₁₇Wees goed vir u dienskneg,

dan kan ek lewe en u woord nakom.

₁₈Maak oop my oë,

sodat ek die wonders uit u wet

kan raaksien.

₁₉Ek is 'n •vreemdeling op aarde;

moet u bevele nie vir my verborge hou nie.

₂₀My lewe kwyn die hele tyd weg

van verlange na u beslissings.

₂₁U bestraf vermeteles, die vervloektes,

hulle wat van u bevele afdwaal.

₂₂Verwyder bespotting

en minagting van my,

want by u bepalings hou ek.

₂₃Selfs al sit leiers met mekaar

en praat oor my –

u dienskneg sal oor u voorskrifte

bly nadink.

₂₄Nog steeds is u bepalings

my grootste vreugde;

hulle is my raadgewers.

₂₅My lewe kleef aan die stof;

maak my weer lewend

volgens u woord.

₂₆Van my lewenspaaie het ek vertel,

en U het my geantwoord;

leer my u voorskrifte.

₂₇Die pad van u opdragte –

laat my dit verstaan,

sodat ek oor u wonders kan nadink.

₂₈My lewe vloei weg van verdriet;

rig my op volgens u woord.

₂₉Die pad van bedrog –

neem dit van my weg;

en u wet –

gee dit genadiglik vir my.

₃₀Die pad van eerlikheid het ek gekies;

u beslissings hou ek voor oë.

₃₁Ek hou aan u bepalings vas;

Here, laat my nie beskaamd staan nie.

₃₂Die pad van u bevele

volg ek geesdriftig,

want U verruim my insig.

₃₃Here, onderrig my in die pad

van u voorskrifte,

sodat ek enduit daarby kan hou.

₃₄Gee my insig, sodat ek by u wet kan hou,

dit met my hele hart kan nakom.

₃₅Begelei my op die pad van u bevele,

want daarin vind ek vreugde.

₃₆Laat my hart na u bepalings neig,

en nie na winsbejag nie.

₃₇Wend my oë daarvan af

om na nuttelose dinge te staar;

hou my lewend op u paaie.

₃₈Doen u woord gestand aan u dienskneg –

u woord wat ontsag wek vir U.

₃₉Neem die bespotting

wat ek vrees van my weg,

want u beslissings is goed.

₄₀Kyk, ek verlang na u opdragte;

hou my lewend deur u •geregtigheid.

₄₁Laat u troue liefde my deel word, Here,

u verlossing volgens u woord,

₄₂sodat ek my spotter kan antwoord;

want ek vertrou op u woord.

₄₃Moet tog nie u betroubare woord

geheel en al uit my mond wegneem nie,

want ek vestig my hoop op u beslissings.

₄₄Ek wil u wet voortdurend nakom,

vir altyd en ewig.

₄₅Ek wil in hierdie wye ruimte

voortbeweeg,

want u opdragte ondersoek ek.

₄₆Ek sal oor u bepalings

voor konings praat

sonder om my te skaam.

₄₇Ek vind vreugde in u bevele

wat ek liefhet;

₄₈ek reik uit na u opdragte

wat ek liefhet;

ek dink na oor u voorskrifte.

₄₉Dink aan u woord aan u dienskneg

waarmee U aan my hoop gegee het.

₅₀Dit is my vertroosting in my ellende,

dat u belofte my lewend hou.

₅₁Vermeteles het my

tot die uiterste toe gespot,

maar van u wet het ek

nie weggedraai nie.

₅₂Ek het u beslissings onthou,

van lank gelede af, Here,

en ek was getroos.

₅₃Woede het my beetgepak

oor goddeloses –

hulle wat u wet verlaat.

₅₄Maar u voorskrifte

was vir my liedere

in 'n plek waar ek

'n vreemdeling was.

₅₅Ek het u Naam

in die nag onthou, Here,

en ek het u wet nagekom.

₅₆Dit het deel geword van my –

dat ek by u opdragte hou.

₅₇U, Here, is my deel,

ek het onderneem om u woorde

na te kom.

₅₈Ek het met my hele hart

u guns gesoek:

Wees my genadig volgens u belofte.

₅₉Ek het my paaie bedink

en my voete teruggebring

na u bepalings.

₆₀Ek het my gehaas en nie getalm

om u bevele na te kom nie.

₆₁Die toue van goddeloses

het my omstrengel,

maar u wet het ek nie vergeet nie.

₆₂In die middel van die nag

staan ek op om U te prys

oor u regverdige beslissings.

₆₃Ek is 'n vriend van almal

wat vir U ontsag het,

en u opdragte nakom.

₆₄Here, u troue liefde vul die aarde;

leer my u voorskrifte.

₆₅U het goed gedoen aan u dienskneg,

Here, volgens u woord.

₆₆Leer my goeie oordeel en kennis,

want ek vertrou op u bevele.

₆₇Voordat ek swaar beproef is,

was ek aan die dwaal,

maar nou kom ek u woord na.

₆₈U is goed en doen goed;

leer my u voorskrifte.

₆₉Vermeteles het my

met leuens beswadder;

maar ek, met my hele hart

hou ek by u opdragte.

₇₀Hulle harte is so gevoelloos

soos vet,

maar ek vind vreugde in u wet.

₇₁Dit is goed vir my

dat ek verneder was,

sodat ek u voorskrifte kon leer.

₇₂Die onderrig uit u mond

is vir my beter as duisende

stukke goud en silwer.

₇₃U hande het my gemaak,

my gevestig;

maak my verstandig,

ek wil u bevele leer.

₇₄Hulle wat vir U ontsag het,

sien my en is bly,

want op u woord wag ek.

₇₅Ek weet, Here,

dat u beslissings regverdig is,

en dat U my in getrouheid

verneder het.

₇₆Laat u troue liefde tog vir my

tot troos wees

volgens u woord aan u dienskneg.

₇₇Laat u ontferming my deel word,

sodat ek kan lewe;

want u wet is my vreugde.

₇₈Laat vermeteles beskaamd staan,

want sonder rede veronreg hulle my;

maar ek sal bly nadink oor u opdragte.

₇₉Laat hulle wat vir U ontsag het,

na my terugkeer,

ja, hulle wat u bepalings ken.

₈₀Laat my hart onberispelik

aan u voorskrifte hou,

sodat ek nie beskaamd staan nie.

₈₁My •siel smag na u verlossing;

op u woord wag ek.

₈₂My oë smag na u belofte en vra:

“Wanneer sal U my troos?”

₈₃Want ek het geword

soos 'n stuk vel vol rook,

maar u voorskrifte

het ek nie vergeet nie.

₈₄Hoeveel dae is daar nog

vir u dienskneg?

Wanneer gaan u die oordeel voltrek

oor my vervolgers?

₈₅Vermeteles het vir my

vangkuile gegrawe,

hulle wat nie volgens u wet

optree nie.

₈₆Al u bevele is betroubaar,

maar hulle vervolg my sonder rede.

Help my!

₈₇Byna het hulle my vernietig

hier op aarde,

maar ek, ek het u opdragte

nie verontagsaam nie.

₈₈Maak my lewend

in ooreenstemming met

u troue liefde,

sodat ek die bepalings

uit u mond kan nakom.

₈₉Vir ewig, Here,

staan u woord vas in die hemel.

₉₀Van geslag tot geslag duur u trou;

U het die aarde gevestig

en dit hou stand.

₉₁Volgens u beslissings

hou dit vandag nog stand,

want alles is u diensknegte.

₉₂As u wet nie my vreugde was nie,

sou ek in my ellende

vergaan het.

₉₃Tot in ewigheid sal ek

u opdragte nie vergeet nie,

want daardeur het U my lewend gemaak.

₉₄Aan U behoort ek; verlos my,

want na u opdragte streef ek.

₉₅Goddeloses wag my in

om my te vernietig;

op u bepalings slaan ek ag.

₉₆Ek het gesien

aan alle volmaaktheid

kom daar 'n einde,

maar u gebod is besonder ruim.

₉₇Hoe lief het ek u wet –

die hele dag dink ek daaroor na.

₉₈U gebod maak my wyser as my vyande,

want dit is altyd daar vir my.

₉₉Ek is verstandiger as al my leermeesters,

want u bepalings is vir my

stof tot nadenke.

₁₀₀Ek het meer insig as oumense,

want by u opdragte hou ek.

₁₀₁Van elke slegte pad

het ek my voete weerhou

sodat ek u woord kon onderhou.

₁₀₂Van u beslissings

het ek nie afgewyk nie,

want dit is U wat my onderrig.

₁₀₃Hoe strelend is u woord vir my verhemelte,

meer as heuning vir my mond.

₁₀₄Uit u opdragte kry ek insig;

daarom haat ek elke bedrieglike pad.

₁₀₅U woord is 'n lamp vir my voet

en 'n lig vir my lewenspad.

₁₀₆Ek het 'n eed afgelê

– en daarby gehou –

om u regverdige beslissings na te kom.

₁₀₇Ek is baie terneergedruk;

Here, maak my lewend

volgens u woord!

₁₀₈Laat die vrywillige offers van my mond

tog vir U aanvaarbaar wees, Here,

en leer my u beslissings.

₁₀₉My lewe is voortdurend in my hande;

maar u wet vergeet ek nie.

₁₁₀Goddeloses het vir my 'n net gespan,

maar van u opdragte

het ek nie afgewyk nie.

₁₁₁Ek het u bepalings as blywende

erfporsie ontvang;

ja, dit is die vreugde van my hart.

₁₁₂Ek rig my hart daarop

om u voorskrifte uit te voer –

vir altyd, tot die einde toe.

₁₁₃Dubbelhartige mense haat ek,

maar u wet het ek lief.

₁₁₄My skuilplek en my skild is U;

op u woord vestig ek my hoop.

₁₁₅Gaan weg van my,

julle kwaaddoeners,

sodat ek by die gebooie

van my God kan hou.

₁₁₆Ondersteun my, volgens u woord,

sodat ek kan lewe;

laat my nie beskaamd staan

oor my hoop nie.

₁₁₇Onderskraag my,

sodat ek verlos kan word;

ek wil voortdurend

aan u voorskrifte aandag gee.

₁₁₈U verwerp almal wat dwaal,

weg van u voorskrifte af;

want hulle bedrog is misleidend.

₁₁₉Soos metaalskuim verwyder U

al die goddeloses van die aarde;

daarom het ek u bepalings lief.

₁₂₀My lyf bewe omdat U

vrees inboesem;

ja, vir u beslissings is ek vol ontsag.

₁₂₁Ek doen wat billik en reg is;

moet my nie aan my verdrukkers

oorlaat nie.

₁₂₂Waarborg die goeie

vir u dienskneg;

vermeteles moet my nie verdruk nie.

₁₂₃My oë smag na u verlossing,

na u belofte van •geregtigheid.

₁₂₄Handel met u dienskneg

volgens u troue liefde,

en leer my u voorskrifte.

₁₂₅Ek is u dienskneg;

gee aan my insig

sodat ek u bepalings kan ken.

₁₂₆Dit is tyd vir die Here

om op te tree –

hulle maak u wet kragteloos.

₁₂₇Daarom het ek u bevele lief,

ja, meer as goud, as suiwer goud.

₁₂₈Daarom volg ek alle opdragte

oor alles;

elke pad van bedrog haat ek.

₁₂₉U bepalings is wonderlik;

daarom hou ek daarby.

₁₃₀As u woorde oopgaan, gee dit lig;

dit gee insig aan onkundiges.

₁₃₁Met 'n oop mond hyg ek,

want ek hunker na u gebooie.

₁₃₂Draai na my en wees my genadig,

soos U gewoonlik maak

met hulle wat u Naam liefhet.

₁₃₃Maak my treë ferm met u woord

en laat geen onreg oor my heers nie.

₁₃₄Bevry my van onderdrukking

deur mense,

sodat ek u opdragte kan nakom.

₁₃₅Laat die lig van u aangesig

oor u dienskneg skyn,

en leer my u voorskrifte.

₁₃₆Strome water vloei uit my oë,

omdat mense nie u wet nakom nie.

₁₃₇Regverdig is U, Here,

en u beslissings is reg.

₁₃₈U het in •geregtigheid

u bepalings uitgevaardig,

en in goeie trou.

₁₃₉My ywer verteer my

omdat my teenstanders

u woorde vergeet.

₁₄₀U woord is volkome gelouter

en u dienskneg het dit lief.

₁₄₁Ek is klein en word geminag,

maar u opdragte vergeet ek nie.

₁₄₂U geregtigheid is regverdig

vir ewig

en u wet is betroubaar.

₁₄₃Benoudheid en angs

het my oorval,

maar u gebooie is my vreugde.

₁₄₄U bepalings is regverdig vir ewig;

gee my insig, sodat ek kan lewe.

₁₄₅Ek roep met my hele hart:

“Antwoord my, Here,

u voorskrifte wil ek onderhou!”

₁₄₆Ek roep na U: “Verlos my

sodat ek u bepalings kan nakom!”

₁₄₇Voor die oggendskemer

roep ek al om hulp;

op u woorde wag ek.

₁₄₈Met oop oë gaan ek

elke nagwaak in,

sodat ek oor u woord kan nadink.

₁₄₉Luister tog in u troue liefde

na my stem,

Here, hou my lewend

volgens u beslissing.

₁₅₀Mense wat slinkse planne

najaag, kom nader;

hulle bly ver van u wet.

₁₅₁Maar U, Here, is naby,

en al u gebooie is betroubaar.

₁₅₂Uit u bepalings weet ek lank reeds

dat U dit vir ewig gevestig het.

₁₅₃Sien tog my ellende raak

en red my,

want u wet vergeet ek nie.

₁₅₄Behartig my regsaak

en verlos my;

hou my lewend op grond van

u belofte.

₁₅₅Verlossing bly ver van goddeloses,

want hulle streef nie

u voorskrifte na nie.

₁₅₆U ontferming is groot, Here;

hou my lewend volgens u beslissings.

₁₅₇My agtervolgers en teenstanders

is baie,

maar van u bepalings

wyk ek nie af nie.

₁₅₈Ek het ontroues gesien

en dit het my met weersin vervul

dat hulle u woord nie onderhou nie.

₁₅₉Sien tog raak

dat ek u opdragte liefhet,

Here, maak my lewend

in ooreenstemming met

u troue liefde.

₁₆₀Die wese van u woord

is betroubaarheid,

en elkeen van u regverdige

beslissings is vir ewig.

₁₆₁Leiers vervolg my sonder rede,

maar net vir u woord het my hart

'n heilige vrees.

₁₆₂Ek verheug my oor u woord,

soos iemand wat 'n groot buit

gevind het.

₁₆₃Ek haat en verafsku valsheid,

maar u wet het ek lief.

₁₆₄Sewe keer per dag loof ek U

oor u regverdige beslissings.

₁₆₅Groot vrede is daar vir hulle

wat u wet liefhet;

vir hulle is daar

geen struikelblokke nie.

₁₆₆Ek vestig my hoop

op u verlossing, Here,

en ek voer u bevele uit.

₁₆₇Ek kom u bepalings na;

ja, ek het dit baie lief.

₁₆₈Ek kom u opdragte

en u bepalings na,

want al my paaie lê oop voor U.

₁₆₉Laat my klaagroep voor U kom, Here;

gee my insig ooreenkomstig u woord.

₁₇₀Laat my smeekgebed U bereik,

red my volgens u belofte.

₁₇₁My lippe laat lofprysing uitstroom,

want U leer my u voorskrifte.

₁₇₂My tong besing u woord,

want al u gebooie is regverdig.

₁₇₃Laat u hand my te hulp kom,

want ek verkies u opdragte.

₁₇₄Ek verlang na u verlossing, Here;

u wet is my vreugde.

₁₇₅Hou my lewend

sodat ek U kan loof

en laat u beslissings my help.

₁₇₆Ek dwaal rond

soos 'n verlore skaap;

soek tog u dienskneg.

U gebooie vergeet ek immers nie.