Psalms 116

₁Ek het die Here lief,

want Hy luister na my stem,

my smeekgebed;

₂ja, Hy draai sy oor na my,

en solank ek leef, sal ek Hom aanroep.

₃Bande van die dood het my omsluit;

angste van die •doderyk het my oorval;

benoudheid en bekommernis

het ek ervaar.

₄Toe het ek die Naam

van die Here bly aanroep:

“Ag, Here, red tog my lewe!”

₅Genadig is die Here en regverdig;

ons God is barmhartig.

₆Die Here beskerm onkundiges;

ek is nietig, maar Hy het my verlos.

₇Kom weer tot rus, my •siel,

want die Here het goed gedoen aan jou.

₈Ja, U het my lewe

van die dood gered,

my oë van trane,

my voete van struikeling.

₉Ek mag leef in die

teenwoordigheid van die Here,

in die land van die lewendes.

₁₀Ek het bly glo, selfs toe ek gesê het:

“Ek is swaar beproef.”

₁₁Ek is een wat in my angstigheid

gesê het:

“Alle mense is leuenaars.”

₁₂Hoe kan ek die Here vergoed

vir al sy goeie dade aan my?

₁₃Die beker van verlossing sal ek oplig

en die Naam van die Here aanroep.

₁₄My geloftes aan die Here sal ek betaal,

daar voor sy hele volk.

₁₅In die oë van die Here

is die dood van sy troue

volgelinge 'n duur verlies.

₁₆Ag, Here, omdat ek u dienskneg is

– ja, ek is u dienskneg,

die seun van u diensmeisie –

het U my boeie losgemaak.

₁₇Aan U sal ek •dankoffers bring

en die Naam van die Here aanroep.

₁₈My geloftes aan die Here sal ek betaal,

daar voor sy hele volk,

₁₉in die voorhowe van die huis

van die Here,

in jou midde, Jerusalem.

Halleluja!