Psalms 95

₁Kom, laat ons voor die Here jubel,

laat ons juig tot eer van die rots

wat ons verlos.

₂Laat ons tot Hom nader

met dankliedere,

met lofgesange juig tot sy eer.

₃Want die Here is 'n groot God,

'n groot Koning bo al die gode,

₄in wie se hand die dieptes

van die aarde is,

en aan wie die kruine

van die berge behoort,

₅aan wie die see behoort.

Ja, Hy het dit gemaak,

en die droë grond

met sy hande gevorm.

₆Gaan in, laat ons in aanbidding

buig en kniel,

laat ons op ons knieë staan

voor die Here, ons Maker.

₇Want Hy is ons God

en ons is die volk wat Hy laat wei,

die kleinvee van sy hand.

As julle vandag maar net

na sy stem wou luister!

₈“Moenie julle harte verhard

soos by Meriba,

soos die dag by Massa

in die woestyn,

₉waar julle voorouers My versoek het,

My beproef het,

selfs nadat hulle my dade

gesien het nie.

₁₀Veertig jaar lank het Ek

'n weersin gehad

in daardie groep mense,

en Ek het gesê,

‘'n Volk met harte wat dwaal,

is hulle,

en hulle ken nie my paaie nie –

₁₁hulle oor wie Ek in my toorn

gesweer het:

“Hulle sal my rusplek

nie binnegaan nie!” ’ ”