Job 36

₂“Wees nog 'n rukkie geduldig met my,

sodat ek jou kan onderrig.

Want daar is nog meer te sê oor God.

₃Ek sal my kennis ver gaan haal,

en ek sal erkenning gee aan

die geregtigheid van my Maker.

₄Ja, dit staan vas:

My woorde is nie leuens nie;

iemand met volmaakte kennis

is hier by jou.

₅Kyk, God is magtig,

maar Hy verwerp niemand nie –

magtig, met 'n hart wat sterk is.

₆Hy hou goddeloses

nie aan die lewe nie,

maar die reg van magteloses

handhaaf Hy.

₇Hy wend van regverdiges

sy oë nie af nie,

maar saam met konings

laat Hy hulle vir altyd

op die troon sit,

sodat hulle verhewe is.

₈“En as mense met kettings geboei is,

gevange geneem is met toue van verdrukking,

₉dan hou Hy hulle dade aan hulle voor,

ook hulle oortredinge –

dat hulle hulle magtig voorgedoen het.

₁₀Hy maak hulle ore oop

vir teregwysing,

en gee opdrag dat hulle

moet wegdraai van onreg.

₁₁As hulle gehoorsaam is

en Hom dien,

sal hulle hulle dae afsluit in voorspoed,

hulle lewensjare met wat aangenaam is.

₁₂Maar as hulle nie luister nie,

sal hulle die rivier oorsteek,

en sal hulle sterf

asof sonder enige kennis.

₁₃Hulle wat oortuigde godloses is,

hoop toorn op;

hulle roep nie aanhoudend om hulp nie,

selfs al boei Hy hulle.

₁₄Hulle lewens kom

op 'n jong ouderdom tot 'n einde –

hulle lewens by manlike

tempelprostitute.

₁₅Hy red magteloses

deur hulle verdrukking;

Hy maak deur beproewing

hulle ore oop.

₁₆“Meer nog, Hy het jou weggelok

uit die kake van benoudheid;

'n onbeperkte ruimte

is in die plek daarvan –

die rustigheid van jou tafel vol ryk kos.

₁₇Jy is vol oordeel oor goddeloses;

oordeel en vonnis is jou voorland.

₁₈Ja, pasop dat jy nie

deur oorvloed mislei word nie;

die grootte van 'n omkoopgeskenk

moet jou nie verlei nie.

₁₉Sal jou rykdom en al die

inspanning van jou kragte

vir jou 'n front vorm,

sodat jy nie in nood verkeer nie?

₂₀Moenie smag na die nag,

om mense uit hulle blyplek

te verwyder nie.

₂₁Pasop!

Moet jou nie tot onreg wend nie;

want dit is die rede waarom jy

deur verdrukking getoets word.

₂₂Kyk, God is verhewe deur sy krag.

Wie is 'n leermeester soos Hy?

₂₃Wie het Hom al

tot verantwoording geroep

oor sy optrede?

Wie het al gesê,

‘U het onreg gepleeg!’?

₂₄“Onthou dat jy sy werk,

wat deur mense besing word,

moet verheerlik.

₂₅Die hele mensdom aanskou dit

met vreugde;

sterflinge kyk van ver af daarna.

₂₆Kyk, God is verhewe –

ons kan dit nie eers bedink nie;

die getal van sy jare –

dit kan nie nagespeur word nie.

₂₇Want Hy trek druppels water op;

dit word vir sy ondergrondse rivier

oorgeskink tot reënwater

₂₈wat die wolke uitstort,

wat hulle oorvloedig laat drup

op die mense.

₂₉Verder, verstaan mens

die uitbult van 'n wolkbank,

die donderslae uit die hut van God?

₃₀Kyk, Hy sprei sy weerlig

oor die wolkbank uit;

die wortels van die see bedek Hy.

₃₁Ja, daarmee oordeel Hy volke;

so gee Hy ook kos in oorvloed.

₃₂Albei sy hande is vol weerlig,

en Hy beveel dit

om die teiken te tref.

₃₃Sy donderende stem

kondig die storm aan,

ook die vee vertel dat dit nader kom.