Jesaja 15

Ja, oornag is Ar-Moab verwoes, vernietig.

Ja, oornag is Kir-Moab verwoes, vernietig.

₂Hulle gaan op na die tempel;

Dibon gaan na die offerhoogtes

om te huil.

Moab weeklaag oor Nebo en Medeba;

op al hulle koppe is kaal plekke,

elke baard is afgeskeer.

₃In hulle strate

het hulle rouklere aan;

op hulle dakke en hulle dorpspleine

weeklaag almal,

terwyl hulle huilend neersak.

₄Gesbon en Elale roep om hulp;

tot by Jahas word hulle stemme

gehoor.

Daarom skreeu die gewapende

manne van Moab;

Moab se moed begewe hom.

₅My hart roep dit uit oor Moab.

Sy vlugtelinge is al by Soar,

by Eglat-Selisija.

Ja, die opdraande na Lugit –

terwyl hulle huil,

gaan hulle daarteen op;

ja, op pad na Goronajim

laat hulle noodroepe opklink

oor die verwoesting.

₆Ja, die waters by Nimrim

word 'n afgryslike plek,

want die gras verdor,

die plantegroei is tot niet –

daar is geen groenigheid meer nie.

₇Daarom, wat hulle gespaar het,

wat weggesit is,

dit dra hulle oor die Wilgerspruit.

₈Ja, die hulpgeroep weergalm

oor die grondgebied van Moab;

hulle weeklag dring deur

tot by Eglajim,

hulle weeklag bereik Beër-Elim,

₉want die waters by Dimon

is vol bloed.

Tog gaan Ek Dimon verder belas –

daar wag leeus

vir wie vrykom van Moab,

vir wie oorbly in die land.