Openbaring 8

₁Toe die Lam die sewende seël van die boekrol breek, was dit 'n halfuur lank stil in die hemel. ₂Toe sien ek die sewe engele wat altyd voor God staan. God het vir hulle sewe trompette gegee.

₃En 'n ander engel het gekom en hy het by die altaar in die hemel gaan staan. Hy het 'n goue wierook-pan gehad. Hy het baie wierook gekry. Hy moes die wierook offer saam met die gebede van almal wat aan God behoort. Hy moes dit offer op die goue altaar wat voor die troon van God is. ₄Die rook van die wierook en die gebede van al die mense wat aan God behoort, het opgegaan van die wierook-pan in die engel se hand, dit het opgegaan voor God. ₅Toe het die engel die wierook-pan geneem. Hy het vuur van die altaar geneem en hy het die wierook-pan vol vuur gemaak. Toe het hy die vuur op die aarde gegooi, en daar was baie donderweer en weerlig en 'n aardbewing, dit het baie geraas.

₆En die sewe engele wat die sewe trompette het, het gereedgemaak om die trompette te blaas.

₇Die eerste engel het sy trompet geblaas. Toe val daar hael en vuur op die aarde, saam met bloed. Een derde van die aarde het verbrand, een derde van die bome het verbrand en al die groen gras het verbrand.

₈Die tweede engel het sy trompet geblaas. Ek het iets gesien wat lyk soos 'n groot berg wat brand en wat vol vuur is. Dit het op die see geval, en een derde van die see het bloed geword. ₉Een derde van alles wat in die see lewe, het doodgegaan en een derde van al die skepe het gesink.

₁₀Die derde engel het sy trompet geblaas. Toe val 'n groot ster uit die lug. Dit het gebrand soos 'n fakkel. Die ster het geval op een derde van die riviere en fonteine. ₁₁Die ster se naam was Wilde-als. Een derde van die water het so bitter soos wilde-als geword, en baie mense het gesterf van die water, want dit het bitter geword.

₁₂Die vierde engel het sy trompet geblaas. Een derde van die son en een derde van die maan en een derde van die sterre het donker geword. Een derde van die dag was donker, en die nag was ook donker.

₁₃En ek het 'n arend gesien wat hoog in die lug vlieg. Ek het gehoor hy skree hard en hy sê: “Dit sal baie baie sleg gaan met die mense op die aarde wanneer die ander drie engele hulle trompette blaas.”