Spreuke 25

₂Mense respekteer en dien vir God,

maar hulle weet nie alles van Hom nie.

Mense respekteer 'n koning

wanneer die koning probeer om alles te weet.

₃Niemand weet hoe hoog die hemel is

en hoe diep die aarde is nie,

en niemand weet wat die koning alles dink nie.

₄Wanneer jy die vuil stukkies en die skuim

uit gesmelte silwer haal,

dan kan 'n silwersmid iets maak

van die silwer.

₅Wanneer jy die mense wat verkeerd doen,

wegvat van die koning,

dan kan die koning regverdig regeer.

₆Jy moenie probeer wys jy is belangrik

wanneer jy by die koning is nie,

jy moenie gaan staan

waar die belangrike mense staan nie.

₇Want dit is beter as iemand vir jou sê:

“Kom op hiernatoe,”

beter as dat hy vir jou sê jy moet jou plek

vir 'n belangrike persoon gee.

Wanneer jy by jou naaste iets gesien het

wat verkeerd is,

₈dan moet jy dit nie dadelik

in die hof gaan vertel nie.

Wat sal jy doen wanneer jou naaste bewys

dat jy verkeerd is?

₉Wanneer jy jou naaste wil beskuldig,

dan moet jy nie vertel wat iemand anders

vir jou gesê het toe julle alleen was nie.

₁₀As jy dit doen, en jou naaste hoor dit,

dan kan hy miskien sê jy praat nie die waarheid nie,

en almal sal onthou wat jy gedoen het.

₁₁Wanneer iemand die regte ding sê

op die regte tyd,

dan is dit soos goue appels

wat iemand op silwer vasgesit het.

₁₂Wanneer iemand wat wysheid het,

vir jou sê hoe jy moet lewe,

dan is dit soos 'n goue ring,

soos juwele van goud.

₁₃Wanneer iemand 'n slaaf gestuur het

en die slaaf het die boodskap reg gebring,

dan is dit soos wanneer dit warm was

en sneeu het dit lekker koel gemaak.

Dit laat die slaaf se eienaar goed voel.

₁₄Wanneer iemand spog oor 'n present

wat hy nie gee nie,

dan is dit soos wanneer daar wolke is en die wind waai,

maar daar is nie reën nie.

₁₅As jy baie geduldig is,

dan kan jy met 'n regeerder praat

en hom laat besluit om iets te doen,

as jy vriendelik praat, dan sal hy miskien begin dink

dat hy iets op 'n ander manier moet doen.

₁₆Wanneer jy heuning kry,

dan moet jy nie te veel eet nie.

As jy te veel eet, dan sal jy naar word.

₁₇Jy moenie te veel by jou naaste kuier nie.

As jy te veel by hom kom,

dan sal hy nie meer lief wees vir jou nie.

₁₈Iemand wat 'n vals getuie

teen 'n ander mens is,

is soos 'n knopkierie, 'n swaard of 'n skerp pyl.

₁₉Jy moenie dink dat 'n ontrou mens

jou sal help wanneer dit sleg gaan met jou nie.

'n Ontrou mens is soos 'n stukkende tand of 'n lam voet.

₂₀Jy moenie vra dat iemand wat wil huil,

liedjies moet sing nie.

Dit is soos wanneer jy op 'n koue dag

iemand se klere wegvat,

of soos wanneer jy asyn op 'n seerplek gooi.

₂₁Wanneer iemand wat vir jou haat, honger is,

dan moet jy vir hom kos gee om te eet.

Wanneer hy dors is,

dan moet jy vir hom water gee om te drink.

₂₂Dan sal jy hom skaam laat word

omdat hy jou haat,

en die Here sal jou beloon.

₂₃Wanneer die noordewind waai, dan gaan dit reën.

Wanneer iemand skinder, dan word mense kwaad.

₂₄Dit is beter om bo-op 'n huis se dak te woon

as om in 'n huis te woon saam met 'n vrou wat aanhou kla.

₂₅Goeie nuus uit 'n ver land

is soos koue water in die keel van 'n mens wat moeg is.

₂₆'n Mens wat reg gelewe het en dan kies

om dieselfde dinge te doen soos 'n persoon

wat verkeerd lewe,

is soos 'n fontein of 'n put vol vuil water.

₂₇Dit is sleg wanneer jy te veel heuning eet,

en ook wanneer iemand jou te veel respekteer.

₂₈Iemand wat homself nie kan regeer nie,

is soos 'n stad wat nie meer 'n muur rondom hom het nie.