1Maar ek sê:
Leiers van die Israeliete,
julle moet luister!
Julle weet wat reg is,
2maar julle haat alles wat goed is
en julle is lief vir alles wat sleg is.
Julle maak of my volk diere is.
3Julle eet hulle vleis
en julle slag hulle vel af.
Julle kap hulle bene stukkend,
julle sny hulle vleis soos 'n mens
vleis sny om dit te kook.
4Dan roep julle na die Here
en julle vra dat Hy julle moet help,
maar Hy antwoord julle nie.
Hy wil nie luister na julle nie,
want julle het verkeerd gedoen.
Die son sal ondergaan vir die profete
5Die Here sê vir die profete wat sy volk bedrieg:
“Wanneer mense vir julle kos gee,
dan sê julle daar sal vrede wees,
en wanneer hulle
nie vir julle kos gee nie,
dan sê julle daar sal oorlog kom.”
6Daarom sal dit nag word vir julle.
Die Here sal nie vir julle wys
wat sal gebeur nie.
Die son sal ondergaan
vir die profete.
Dit sal donker word vir hulle.
7Die profete dink hulle weet
wat sal gebeur,
maar hulle sal nie weet
wat om te sê nie,
want God sal nie
met hulle praat nie.
8Net ek, Miga, is sterk.
Die Gees van die Here
het my sterk gemaak.
Ek weet wat is reg,
en ek is nie bang
om vir die Israeliete te sê
dat hulle sonde gedoen het nie.
9Leiers van die Israeliete,
julle moet luister!
Julle dink dit is nie belangrik
om reg te doen nie,
julle dink dit is reg
om verkeerd te doen.
10Die hele Jerusalem
is vol moordenaars
en mense wat verkeerd doen.
Dit is julle skuld.
11Die leiers wat moet sê wat reg is,
vra geld om dit te doen.
Die profete wat moet sê
wat sal gebeur,
vra geld om dit te doen.
Julle doen nie reg nie, maar julle sê
die Here is by julle.
Julle sê Hy sal dit
goed laat gaan met julle.
12Omdat julle dit doen,
sal die vyande Jerusalem omploeg
soos 'n mens
'n stuk grond omploeg.
Hulle sal Jerusalem verwoes,
en die berg
waar die tempel nou staan,
sal vol bosse wees.
