Lukas 1

₁Geagte Teofilus, baie mense het al geskryf oor alles wat gebeur het toe Jesus op die aarde gelewe het. ₂Hulle het alles uitgevind by die mense wat van die begin af by Jesus was en wat self alles gesien het. Hulle het ook die mense uitgevra wat die goeie boodskap oor Jesus gebring het. ₃Ek het ook alles uitgevind wat die mense weet oor Jesus se lewe op die aarde en ek het lank daaroor gedink. Nou het ek besluit om alles vir jou te skryf soos dit gebeur het, alles wat ek weet. ₄Daarom kan jy seker wees dat die dinge wat jy geleer het, waar en reg is.

₅Herodes was die koning van Judea. In daardie tyd was daar 'n priester, Sagaria. Hy was een van die priesters van Abia se groep. Hulle het by die tempel gewerk wanneer dit hulle beurt was. Sagaria was getroud met Elisabet. Sy was van die nageslag van Aäron.

₆Sagaria en Elisabet het gelewe soos God wou hê, en hulle was gehoorsaam aan al die wette van die Here. ₇Maar hulle het nie kinders gehad nie, omdat Elisabet onvrugbaar was. Hulle altwee was ook al baie oud. ₈Dit was eendag die beurt van Abia se groep priesters om die werk in die tempel te doen. ₉Die priesters het altyd lootjies getrek om te sien wie moes ingaan om die wierook-offer te bring. Dit was toe Sagaria wat moes ingaan in die gewyde kamer van die tempel van die Here. ₁₀Toe Sagaria ingaan om die wierook-offer te bring, het al die mense buite gebly en gebid. ₁₁'n Engel van die Here het gekom en hy het aan Sagaria verskyn. Die engel het regs van die wierook-altaar gestaan. ₁₂Sagaria het groot geskrik toe hy die engel sien en hy het baie bang geword. ₁₃Maar die engel het vir hom gesê: “Sagaria, jy moenie bang wees nie, God het geluister na jou gebed. Jou vrou Elisabet sal 'n seun kry, en jy moet hom Johannes noem. ₁₄Jy sal baie bly wees en baie ander mense sal bly wees wanneer hy gebore word, ₁₅want hy sal belangrik wees vir die Here. Hy mag nie wyn of bier drink nie. Die Heilige Gees sal in hom wees vandat sy ma swanger geword het. ₁₆Hy sal baie Israeliete laat terugkom na die Here hulle God. ₁₇Johannes sal 'n profeet van God wees. Hy sal dapper en sterk wees, soos Elia. Hy sal vrede maak tussen pa's en hulle kinders. Hy sal ongehoorsame mense laat doen wat God wil hê. Dan sal hulle 'n volk wees wat reg is om God te dien.”

₁₈Sagaria het vir die engel gesê: “Hoe sal ek weet dat dit sal gebeur? Ek is 'n ou man en my vrou is ook baie oud.”

₁₉Die engel het vir hom gesê: “Ek is die engel Gabriël, ek werk vir God. God het my gestuur om met jou te praat en vir jou hierdie goeie boodskap te bring. ₂₀Die boodskap wat ek vir jou gebring het, is waar. Dit sal gebeur. Maar jy het my nie geglo nie, en daarom sal jy stom wees en jy sal nie kan praat nie, tot die dag wanneer hierdie dinge sal gebeur.”

₂₁Die mense het buite gewag vir Sagaria en hulle het gewonder hoekom hy so lank in die tempel bly. ₂₂Toe Sagaria uitkom, kon hy nie met die mense praat nie, en hulle het besef God het iets met hom laat gebeur in die tempel. Hy het vir hulle met sy hande gewys dat iets met hom gebeur het, en hy het stom gebly. ₂₃Toe die priesters van Abia se groep klaar gewerk het by die tempel, het Sagaria teruggegaan na sy huis. ₂₄Kort daarna het sy vrou Elisabet swanger geword, en sy het vyf maande lank nie uit die huis gegaan nie. Sy het gesê: ₂₅“Die Here het my gehelp, Hy het gesien ek is hartseer. Hy het geweet die mense spot my omdat ek nie kinders het nie. Nou het Hy dit verander, niemand sal my nou meer spot nie.”

₂₆Toe Elisabet ses maande swanger was, het God die engel Gabriël gestuur na die stad Nasaret in Galilea. ₂₇God het hom gestuur na 'n meisie wat verloof was aan Josef. Josef was 'n man van die nageslag van koning Dawid. Die meisie se naam was Maria, en sy was 'n maagd. ₂₈Die engel het na Maria toe gegaan en gesê: “Ek groet jou. God is goed vir jou. Ja, die Here is by jou.”

₂₉Maria het baie groot geskrik toe sy hoor wat die engel vir haar sê en sy het gewonder wat dit beteken. ₃₀Die engel het vir haar gesê: “Maria, jy moenie bang wees nie, want God is goed vir jou. ₃₁Jy sal swanger word en jy sal 'n seun kry. Jy moet Hom Jesus noem. ₃₂Hy sal baie belangrik wees, die Hoogste God sal Hom sy Seun noem. Die Here God sal Hom laat regeer soos sy voorvader Dawid. ₃₃Jesus sal altyd regeer oor die nageslag van Jakob. Hy sal nooit ophou om Koning te wees nie.”

₃₄Maria het vir die engel gesê: “Hoe kan ek 'n kind kry? Ek het nog nooit by 'n man geslaap nie.”

₃₅Die engel het vir haar gesê: “Die Heilige Gees sal op jou kom en die krag van die Hoogste God sal soos 'n skaduwee oor jou wees. Daarom sal God sê die Kind wat gebore word, is heilig, Hy is die Seun van God. ₃₆Maria, daar is 'n vrou, Elisabet, in jou familie, sy is oud en sy kon nooit kinders kry nie, maar sy sal ook 'n seun kry. Sy is nou ses maande swanger. ₃₇God kan alles doen, daar is niks wat Hy nie kan doen nie.”

₃₈Maria het gesê: “Ek sal doen wat die Here wil hê. Die Here kan met my doen wat jy gesê het.”

Toe het die engel weggegaan van haar.

₃₉Nie lank daarna nie het Maria haastig na 'n stad in Judea gegaan, na 'n plek op die berge. ₄₀Sy het in Sagaria se huis ingegaan en vir Elisabet gegroet. ₄₁Toe Elisabet hoor dat Maria haar groet, het die baba wat binne-in haar was, geskop. Die Heilige Gees het in Elisabet gekom ₄₂en sy het opgewonde gesê: “Maria, die Here seën jou, meer as vir al die ander vroue. Hy seën ook die kind wat in jou is. ₄₃Dit is vir my wonderlik dat jy na my toe gekom het, jy, die ma van my Here. ₄₄Toe jy my groet en ek jou stem hoor, was die kind binne-in my baie bly, en hy het geskop. ₄₅Jy sal gelukkig wees, want jy het geglo dat die Here sal doen wat Hy vir jou belowe het.”

₄₆Toe het Maria gesê:

₅₆Maria het omtrent drie maande by Elisabet gebly, en toe het sy teruggegaan na haar huis.

₅₇Toe Elisabet se baba later gebore is, was dit 'n seuntjie. ₅₈Haar bure en familie het gehoor dat die Here goed was vir haar en hulle was baie bly saam met haar. ₅₉Op die agste dag het die mense gekom om die kindjie te besny. Hulle wou hom Sagaria noem. Dit was ook sy pa se naam. ₆₀Maar sy ma het gesê: “Nee, sy naam moet Johannes wees.”

₆₁Die mense het vir haar gesê: “Daar is niemand in jou familie wat die naam Johannes het nie.”

₆₂Hulle het met gebare vir Sagaria gevra wat hy die seuntjie wil noem. ₆₃Sagaria het gesê hulle moet vir hom 'n skryfbordjie gee en hy het daarop geskryf: “Sy naam is Johannes.”

Almal was verbaas. ₆₄Sagaria kon dadelik weer praat, en hy het God geprys. ₆₅Al die mense wat daar naby gewoon het, was verbaas en bang. Al die mense het gepraat oor alles wat gebeur het, ook die mense wat in die berge in die provinsie Judea gewoon het.

₆₆Almal wat daarvan gehoor het, het daaroor gedink en gesê: “Ons wonder wat sal hierdie seuntjie eendag doen.”

Almal kon sien die Here was by Johannes.

₆₇Die Heilige Gees het gekom in Sagaria, Johannes se pa. Sagaria het gepraat soos die profete en hy het gesê:

₈₀Johannes het groot geword, sy liggaam en sy gees het sterk geword. Hy het in die woestyn gewoon totdat hy begin preek het vir die mense van Israel.