Johannes 7

₁Jesus het toe na baie plekke in die provinsie Galilea gegaan. Hy wou nie na die provinsie Judea gaan nie, want die Jode wou Hom daar doodmaak. ₂Die Jode se Hutte-fees was naby. ₃Jesus se broers het vir Hom gesê: “Jy moet hier weggaan en na Judea gaan. Dan kan jou dissipels die wonderwerke sien wat jy doen. ₄Dit help nie 'n mens doen iets waar niemand dit kan sien nie, want dan moet jy nie dink almal sal weet van jou nie. Wanneer jy hierdie wonderwerke doen, moet jy dit só doen dat al die mense kan sien dit is jý wat dit doen.”

₅Jesus se broers het nie in Hom geglo nie. ₆Toe sê Jesus vir hulle: “Dit is nog nie my tyd nie. Julle doen met julle tyd wat julle wil. ₇Die mense van die wêreld kan julle nie haat nie, maar hulle haat My, want Ek sê hulle doen slegte dinge. ₈Julle kan na die fees gaan. Ek gaan nie na die fees nie, want dit is nog nie my tyd nie.”

₉Nadat Jesus dit alles vir sy broers gesê het, het Hy in die provinsie Galilea gebly.

₁₀Jesus se broers het na die fees gegaan. Later het Jesus self ook na die fees gegaan, maar die mense het dit nie geweet nie. ₁₁Daar by die fees het die Jode na Jesus gesoek. Hulle het gevra: “Waar is daardie man?”

₁₂Die mense het baie oor Jesus gepraat. Party mense het gesê: “Jesus is 'n goeie man.”

Ander mense het gesê: “Nee, hy lieg vir die mense.”

₁₃Die mense het nie hard gesê wat hulle van Jesus dink nie, hulle wou nie hê die Jode moet dit hoor nie, want hulle was bang vir die Jode. ₁₄Op die vierde dag van die fees het Jesus na die tempel gegaan en Hy het vir die mense begin leer. ₁₅Die Jode was verbaas. Hulle het gesê: “Niemand het vir hierdie man geleer nie. Hoe weet hy so baie dinge?”

₁₆Jesus het vir hulle gesê: “Dit wat Ek vir julle leer, kom nie van My nie. Dit kom van God wat My na die wêreld gestuur het. ₁₇Iemand wat doen wat God wil hê, sal weet of die dinge wat Ek vir julle leer, van God kom en of dit van Myself kom. ₁₈Iemand wat vir ander mense dinge leer wat van homself kom, doen dit sodat die mense kan dink hy is belangrik. Ek doen dit nie. Ek wil hê dat die mense moet weet God is belangrik, God wat My na die wêreld gestuur het. Daarom kan die mense My glo. Ek is nie vals nie. ₁₉Moses het vir julle wette gegee, maar nie een van julle doen wat die wette sê nie. Hoekom probeer julle My doodmaak?”

₂₀Die mense het vir Jesus gesê: “Jy is mal, niemand probeer jou doodmaak nie.”

₂₁Jesus het vir hulle gesê: “Ek het net een wonderwerk gedoen, en julle is verbaas omdat Ek dit op die Sabbatdag gedoen het. ₂₂Moses het vir julle geleer om julle seuns te besny. Maar dit was nie net Moses nie, julle voorvaders het dit ook gedoen. En julle besny ook partymaal seuns op die Sabbatdag. ₂₃Julle besny iemand op die Sabbatdag om gehoorsaam te wees aan die Wette van Moses. Hoekom is julle nou kwaad vir My wanneer Ek 'n mens se hele liggaam op die Sabbatdag gesond maak? ₂₄Julle moenie na iemand se buitekant kyk en dan sê hy doen verkeerd nie. Julle moet regverdig wees.”

₂₅Party van die mense in Jerusalem het gesê: “Daar is die man, die mense wil hom doodmaak. ₂₆Hier praat hy nou voor al die mense en niemand sê hy praat verkeerd nie. Miskien dink die leiers hy is die Christus. ₂₇Maar hierdie man kan nie die Christus wees nie, want ons weet van waar hy kom. Wanneer die Christus kom, dan sal niemand weet van waar Hy kom nie.”

₂₈Jesus het vir die mense in die tempel geleer en Hy het hard gesê: “Julle sê julle ken My en julle weet van waar Ek kom. Dit is nie waar nie. Ek het nie self besluit om na die wêreld te kom nie, God het My gestuur. Wat Hy doen, is reg. Maar julle ken Hom nie. ₂₉Ek ken Hom, want Ek kom van Hom. Dit is Hy wat My gestuur het.”

₃₀Toe het die mense probeer om Jesus te vang, maar niemand kon dit doen nie. Dit was nog nie sy tyd nie. ₃₁Baie van die mense het in Hom geglo. Hulle het gesê: “Wanneer die Christus kom, sal Hy dan meer wondertekens doen as hierdie man? Nee.”

₃₂Die Fariseërs het gehoor wat die mense oor Jesus sê. Daarom het die priesterleiers en die Fariseërs wagte gestuur om Jesus te vang. ₃₃Jesus het vir hulle gesê: “Ek sal nog 'n kort tydjie by julle wees. Dan gaan Ek terug na God toe wat My na die wêreld gestuur het. ₃₄Julle sal My soek, maar julle sal My nie kry nie. Julle sal nie kan gaan waar Ek sal wees nie.”

₃₅Toe het die Jode vir mekaar gesê: “Waarnatoe sal hy gaan waar ons hom nie sal kry nie? Gaan hy miskien by die Grieke woon en vir hulle leer? ₃₆Wat beteken dit wanneer hy sê: ‘Julle sal My soek en My nie kry nie,’ en ‘Julle sal nie kan gaan waar Ek sal wees nie’?”

₃₇Die laaste dag van die fees was die belangrikste dag. Op daardie dag het Jesus opgestaan en hard gesê: “As iemand dors is en hy wil lewe, dan kan hy na My toe kom en water kom drink wat die ewige lewe gee. ₃₈Dit sal wees soos daar in die Ou Testament geskryf is:

₃₉Toe Jesus dit gesê het, het Hy van die Heilige Gees gepraat. Almal wat in Jesus geglo het, het later die Heilige Gees ontvang. God het eers vir hulle gewys dat Jesus ook God is, daarna het hulle die Gees ontvang.

₄₀Toe party van die mense hoor wat Jesus sê, sê hulle: “Hierdie man is regtig die Profeet.”

₄₁Party mense het gesê: “Hy is die Christus.”

Maar ander mense het gesê: “Nee, die Christus sal nie kom nie uit die provinsie Galilea nie. ₄₂In die Ou Testament is geskryf dat die Messias van die nageslag van Dawid kom. Daar is ook geskryf dat die Messias van Betlehem kom, die dorpie waar Dawid gewoon het.”

₄₃Toe het die mense gestry oor Jesus. ₄₄Party van hulle wou Hom vang, maar niemand kon dit doen nie.

₄₅Die wagte het teruggegaan na die priesterleiers en die Fariseërs. Die priesterleiers en die Fariseërs het vir die wagte gevra: “Hoekom het julle nie vir Jesus gebring nie?”

₄₆Die wagte het gesê: “Ons het nog nooit iemand hoor praat wat soos Jesus gepraat het nie.”

₄₇Die Fariseërs sê toe vir hulle: “Jesus het vir julle ook gelieg, en julle het dit geglo. ₄₈Glo een van die leiers of die Fariseërs in Jesus? Nee, niemand nie! ₄₉Maar hierdie mense wat in Jesus glo, ken nie die Ou Testament nie. God sal hulle straf.”

₅₀Nikodemus wat vroeër in die nag na Jesus toe gekom het, was een van die Fariseërs. Hy sê toe vir die Fariseërs en die priesterleiers: ₅₁“Ons wette sê ons moet eers na iemand luister en ons moet presies weet wat hy gedoen het, dan kan ons hom oordeel.”

₅₂Die Fariseërs sê toe vir Nikodemus: “Jy praat nou soos iemand wat uit die provinsie Galilea kom. Gaan lees in die Ou Testament en jy sal sien dat 'n profeet nooit uit die provinsie Galilea kom nie.”

₅₃[Al die mense het na hulle huise gegaan,