Die mense van Efraim sal verdwyn
1Die Here het gesê:
“Lank gelede was almal bang
vir die mense van Efraim.
Al die Israeliete het gedink
die mense van Efraim
is die belangrikste.
Maar die mense van Efraim
het sonde gedoen,
hulle het vir Baäl gedien,
en daarom het hulle gesterf.
2Maar nou doen hulle nog meer sonde:
Hulle maak beelde.
Hulle vat silwer
en maak daarvan beelde
van afgode
soos hulle dink
die beelde moet lyk.
Ambagsmanne maak die beelde
wat soos 'n bul-kalf lyk,
en hulle sê die mense
wat wil offer,
moet die beelde soen.
3Daarom sal die mense
van Efraim verdwyn
soos 'n wolk in die oggend,
soos dou wat vroeg weggaan.
Hulle sal verdwyn
soos kaf wat wegwaai
van die dorsvloer,
soos rook wat kom
deur 'n gat in 'n huis se muur.
4“Toe hulle uit Egipte gekom het,
was Ek hulle God die Here.
Net Ek was naby hulle,
daar was nie 'n ander god
wat hulle kon red nie.
5Ek was saam met hulle
in die woestyn,
in die droë land.
6Maar toe Ek vir hulle
kos gegee het,
en hulle genoeg geëet het,
toe het hulle hoogmoedig geword
en hulle het vergeet dat Ek hulle God is.
7“Ek het toe besluit
Ek wil die mense
van Efraim doodmaak.
Ek het geword soos 'n leeu,
soos 'n luiperd wat langs die pad
vir hulle lê en wag.
8Ek was so kwaad
soos 'n beer-wyfie
wanneer iemand
haar kleintjies wegvat.
Soos 'n leeu wou Ek
hulle bors oopskeur
en hulle opvreet.
Soos 'n roofdier wou Ek
hulle stukkend skeur.
9“Ek wou hulle doodmaak,
want hulle was teen My,
hulle was teen die God
wat vir hulle gehelp het.
10Hulle koning is nou weg,
hy kon hulle nie help nie,
nie in een van hulle stede nie.
Hulle leiers is ook weg.
Die Israeliete het gesê:
‘Gee vir ons 'n koning
en amptenare.’
11Ek was kwaad vir hulle,
maar Ek het vir hulle
'n koning gegee,
en Ek het die koning weggevat
toe Ek baie kwaad was.”
Die dood moet hulle vat
12Die Here weet alles
wat die mense
van Efraim gedoen het,
Hy onthou al hulle sondes.
13Hulle was soos 'n baba
wat gebore moes word
maar wat te dom was om te weet
hoe hy uit sy ma
se liggaam kan kom.
14Die Here vra:
“Moet Ek nou betaal
sodat hulle nie
in die doderyk kom nie?
Moet Ek betaal
sodat hulle nie sterf nie?
Nee, die dood moet hulle vat
soos dorings 'n mens vashou,
soos wanneer bye
mense doodsteek
met hulle angels.
Ek is nie meer
jammer vir hulle nie.”
15Efraim is soos 'n groen plant
wat mooi groei tussen die riete,
maar die oostewind sal kom.
Die Here sal die wind stuur
uit die woestyn,
en daar sal niks water oorbly nie,
die fonteine sal leeg word.
Die vyande sal kom
en hulle sal die mooi goed vat,
hulle sal alles vat
wat die mense
bymekaargemaak het.
