God is altyd by ons – 23 Augustus 2024
Deur Xanthe Hancox
Bybelteks(te)
PSALMS 139
Koning Dawid, die skrywer van hierdie psalm, is verstom oor die feit dat daar geen plek is waarnatoe hy kan gaan waar God nie teenwoordig is nie. Sy woorde herinner ons daaraan dat ons nooit alleen is nie, maak nie saak hoe geïsoleerd ons mag voel nie. God is alomteenwoordig – nie so dat dit ons versmoor nie, maar op ‘n manier wat troos en vrede gee. Of ons nou die hoogste hoogtepunte of die laagste laagtepunte beleef, God is reg daar saam met ons.
Die beeldspraak wat Dawid gebruik is kragtig: selfs al klim ons op na die hemel of gaan lê in die doderyk, woon by die einde van die see, neem die vlerke van die daeraad, God se hand sal ons steeds lei en vashou. Dit vertel ons van die grensloosheid van God se oneindige liefde en sorg. Sy teenwoordigheid word nie geografies of deur omstandighede ingeperk nie, dit oorskry alle grense.
In oomblikke van vreugde, is God by ons en vier ons oorwinnings. In oomblikke van wanhoop is Hy daar om te vertroos en krag te gee. Wanneer ons onseker is oor die toekoms of verlore voel, is sy hand daar om ons te lei. Wanneer ons dit verstaan sal dit die manier wat ons uitdagings hanteer, verander. Ons kan moed en vertroue vind in die wete dat ons altyd binne bereik van God se liefdevolle teenwoordigheid is.
Dink vir ‘n oomblik oor jou eie lewe na. Is daar tye wat jy ver van God voel? Of miskien gaan jy tans deur ‘n tyd waar jy alleen voel? Onthou, God is by jou. Hy sien jou raak, Hy ken jou en Hy sal jou nooit verlaat nie. Dit maak nie saak waarheen jy gaan of wat jy moet hanteer nie, jy kan weet dat God se hand jou sal lei en vashou.
Gebed: Hemelse Vader, dankie vir u konstante teenwoordigheid in my lewe. Dit maak nie saak waarheen ek gaan of wat ek beleef nie, ek weet dat U by my is en my met u liefdevolle hand lei. Help my om altyd bewus te wees van u teenwoordigheid, en dat ek troos en krag sal put in die wete dat ek nooit alleen is nie. In tye van blydskap en in tye van swaarkry, gee dat ek altyd op u leiding en beskerming sal vertrou. In Jesus se Naam. Amen
