Wanneer wag ondraaglik voel – 18 Mei 2020

₅Ek stel my vertroue in die Here, ek vertrou op Hom,

ek wag op die vervulling van sy woord.

₆Ek wag op die Here

meer as wat die wagte op die môre wag,

wagte op die môre.

₇Wag op die Here, Israel,

want by die Here is daar troue liefde,

by Hom is die verlossing seker.

₈Hy alleen sal Israel verlos

van al sy sondes.

Selfverheffing en hoogmoed

is daar nie by my nie, Here.

Ek maak my nie besorg oor groot dinge nie,

dinge wat bo my vermoë is.

₂Ek het rus en kalmte gevind.

Soos 'n kindjie wat by sy moeder tevredenheid gevind het,

so het ek tevredenheid gevind.

₃Wag op die Here, Israel,

nou en vir altyd.

Dink tog aan Dawid, Here,

aan alles wat hy deurgemaak het,

₂aan die eed wat hy teenoor die Here afgelê het,

sy gelofte aan die magtige God van Jakob:

₃“Ek sal nie in my slaapkamer ingaan nie

en nie op die bed wat vir my reggemaak is, gaan lê nie,

₄ek sal my geen slaap gun nie,

en sal nie eens insluimer nie,

₅totdat ek 'n plek vir die Here gereed gemaak het,

'n woning vir die magtige God van Jakob!”

₆Ons het van die verbondsark gehoor in Efrata,

ons het dit gevind in die Jaärsveld.

₇Kom ons gaan sy woning binne,

kom ons buig daar in aanbidding voor Hom.

₈Kom na u rusplek toe, Here,

U en die ark, die teken van u mag.

₉Gee aan u priesters die oorwinning,

laat u troue dienaars juig.

₁₀Ter wille van u dienaar Dawid,

moet tog nie u gesalfde verstoot nie.

₁₁Die Here het 'n eed teenoor Dawid afgelê,

en dit staan vas, Hy sal daarvan nie afwyk nie:

“Ek sal een van jou eie seuns in jou plek laat koning word.

₁₂As jou nakomelinge hulle aan my verbond hou

en aan die verordeninge wat Ek hulle leer,

sal ook hulle seuns vir altyd op jou troon heers.”

₁₃Ja, die Here het Sion gekies

en dit vir Hom as woning begeer:

₁₄“Dit is my rusplek vir altyd;

hier wil Ek woon, dit is my begeerte.

₁₅Ek sal Sion ryklik seën met wat hy nodig het,

aan sy armes voedsel in oorvloed skenk.

₁₆Ek sal aan sy priesters die oorwinning gee

en my troue dienaars sal juig.

₁₇Daar sal Ek die heerskappy vir Dawid vestig,

vir my gesalfde 'n nageslag op die troon verseker.

₁₈Sy vyande sal Ek magteloos laat toekyk,

maar sý kroon sal bly skitter.”

Hoe goed, hoe mooi is dit

as broers eensgesind saam woon!

₂Dit is soos reukolie

wat van die kop af in die baard afloop,

die baard van Aäron,

af tot by die soom van sy klere.

₃Dit is soos die dou van Hermonberg

wat op die berge by Sion val.

Waar broers so saam woon, skenk die Here sy seën:

'n lang, lang lewe.

Kom, prys die Here,

julle almal wat Hom dien,

julle wat in die nag in die tempel van die Here staan!

₂Hef julle hande in gebed op na die heiligdom

en prys die Here!

₃Mag die Here jou seën uit Sion,

Hy wat hemel en aarde gemaak het.

₁Prys die Here,

prys die Naam van die Here,

prys Hom, dienaars van die Here,

₂julle wat in die tempel van die Here staan,

in die voorhowe van die tempel van ons God!

₃Prys die Here, want die Here is goed,

sing tot eer van sy lieflike Naam.

₄Die Here het Jakob vir Hom gekies,

Israel as die volk wat Syne is.

₅Ek weet, die Here is groot,

ons Here is verhewe bo al die gode.

₆Alles wat die Here wil, doen Hy,

in die hemel en op aarde,

in die see, in al die oseane.

₇Hy laat die wolke opkom oor die horison,

Hy maak die weerligstrale vir die reën

en bring die wind te voorskyn.

₈Hy het die eerstelinge in Egipte getref,

mense sowel as diere;

₉Hy het oor jou, Egipte, groot en skrikwekkende dinge gebring,

oor die farao en al sy amptenare;

₁₀Hy het baie nasies verslaan

en magtige konings laat sneuwel:

₁₁koning Sihon van die Amoriete,

koning Og van Basan,

en al die konings in Kanaän.

₁₂Hy het hulle land as geskenk aan Israel gegee,

as geskenk aan sy volk.

₁₃Here, U is altyd daar,

U is daar van geslag tot geslag.

₁₄Die Here behartig die regsaak van sy volk:

Hy ontferm Hom oor sy dienaars.

₁₅Wat die nasies het, is afgode, van silwer en goud,

die werk van mensehande;

₁₆'n mond het hulle, maar praat kan hulle nie,

oë het hulle, maar sien kan hulle nie;

₁₇ore het hulle, maar hoor kan hulle nie,

hulle haal nie asem nie.

₁₈Wie hulle maak en op hulle vertrou,

sal net soos hulle word.

₁₉Huis van Israel, loof die Here,

huis van Aäron, loof die Here,

₂₀huis van Levi, loof die Here,

julle wat die Here dien, loof die Here!

₂₁Aan die Here kom die lof uit Sion toe,

aan Hom wat in Jerusalem woon!

Prys die Here!

₁Loof die Here, want Hy is goed.

₂Loof die oppermagtige God.

₃Loof die magtigste van alle maghebbers.

₄Hy het magtige dade gedoen, Hy alleen.

₅Hy het die hemel met soveel insig gemaak.

₆Hy het die aarde op die waters gevestig.

₇Hy het die groot hemelligte gemaak,

₈die son om te heers oor die dag,

₉die maan en die sterre om te heers oor die nag.

₁₀Hy het die Egiptenaars getref met die dood van hulle eersgeborenes

₁₁en Israel onder hulle uit gelei

₁₂met sy groot mag en krag.

₁₃Hy het die Rietsee in twee gekloof

₁₄en Israel daar deur laat trek,

₁₅maar die farao met sy leërmag in die Rietsee gestort.

₁₆Hy het sy volk deur die woestyn laat trek.

₁₇Hy het groot konings oorwin,

₁₈magtige konings laat sneuwel:

₁₉koning Sihon van die Amoriete,

₂₀koning Og van Basan.

₂₁Hy het hulle land as geskenk gegee,

₂₂as geskenk aan Israel, sy dienaar.

₂₃Hy het aan ons gedink in ons vernedering

₂₄en ons uit die mag van ons teëstanders bevry.

₂₅Hy gee voedsel aan al wat lewe.

₂₆Loof die God van die hemel!

₁By die riviere van Babel,

daar het ons gesit, en ons trane het gevloei

as ons aan Sion dink.

₂Aan die wilgerbome in daardie land

het ons ons liere opgehang

₃toe dié wat vir ons gevange weggevoer het,

ons gevra het om 'n lied te sing,

toe dié wat vir ons leed aangedoen het,

van ons vrolikheid wou hê:

“Sing vir ons 'n lied oor Sion!”

₄Hoe kan ons die lied van die Here sing

in 'n vreemde land?

₅As ek jou sou vergeet, Jerusalem,

mag my regterhand dan verlam raak.

₆Mag my tong aan my verhemelte vaskleef

as ek aan jou nie dink nie,

as Jerusalem nie my grootste vreugde bly nie.

₇Onthou die Edomiete, Here,

die dag toe Jerusalem ingeneem is,

hoe hulle aangehou het met sê:

“Breek af, breek af die stad

tot op sy fondamente!”

₈Dat jy verwoes sal word, Babel, is seker.

Gelukkig is die man wat jou terugbetaal

vir wat jy ons aangedoen het!

₉Gelukkig is hy wat jou babatjies gryp

en teen 'n klip verbrysel.

Ek wil U met my hele hart loof.

Laat die gode maar hoor;

dit is tot u eer dat ek sing.

₂Ek wil na u heilige tempel toe buig

en u Naam roem om u liefde en trou,

want U het u Naam en u woord bo alles gestel.

₃Toe ek na U geroep het, het U my gebed verhoor

en my nuwe krag gegee.

₄Al die konings van die aarde sal U loof, Here,

wanneer hulle u woord hoor,

₅hulle sal sing oor wat die Here gedoen het,

want die mag van die Here is groot.

₆Ja, al is die Here hoog verhewe,

Hy gee om vir die nederige,

maar Hy sien van ver af deur die hoogmoedige.

₇As die nood my oorval,

hou U my in die lewe teen die woede van my vyande in:

U strek u hand uit,

u regterhand red my.

₈Die Here sal vir my alles goed laat afloop.

Aan u liefde, Here, is daar geen einde nie.

Moet tog nie die werk van u hande laat vaar nie.

Here, U sien dwarsdeur my,

U ken my.

₂Of ek sit en of ek opstaan, U weet dit,

U ken my gedagtes nog voordat hulle by my opkom.

₃Of ek reis en of ek oorbly, U bepaal dit,

U is met al my paaie goed bekend.

₄Daar is nog nie 'n woord op my tong nie

of U, Here, weet wat dit gaan wees.

₅U omsluit my van alle kante,

U neem my in besit.

₆Dié wete oorweldig my,

dit is te hoog vir my begrip.

₇Waarheen sou ek gaan om u Gees te ontvlug?

Waarheen sou ek vlug om aan u teenwoordigheid te ontkom?

₈Klim ek op na die hemel, is U daar,

gaan lê ek in die doderyk, is U ook daar.

₉Vlieg ek na die ooste,

of gaan woon ek in die verre weste,

₁₀ook daar lei u hand my,

hou u regterhand my vas.

₁₁Ek sou die duisternis kon vra om my weg te steek,

of die lig rondom my om in nag te verander,

₁₂maar vir U is selfs die duisternis nie donker nie

en die nag so lig soos die dag,

duisternis so goed soos lig.

₁₃U het my gevorm,

my aanmekaargeweef in die skoot van my moeder.

₁₄Ek wil U loof,

want U het my op 'n wonderbaarlike wyse geskep.

Wat U gedoen het,

vervul my met verwondering.

Dit weet ek seker:

₁₅geen been van my was vir U verborge

toe ek gevorm is waar niemand dit kon sien nie,

toe ek aanmekaargeweef is diep in die moederskoot.

₁₆U het my al gesien toe ek nog ongebore was,

al my lewensdae was in u boek opgeskrywe

nog voordat ek gebore is.

₁₇Hoe wonderlik is u gedagtes vir my, o God,

hoe magtig hulle almal!

₁₈As ek hulle sou wou opnoem –

hulle is meer as wat daar sand is,

en as ek daarmee klaar is,

sou ek nog steeds met U te doen hê.

₁₉As U tog maar die goddelose uit die weg wou ruim, o God!

Gaan weg van my af, julle moordenaars!

₂₀Dit is hulle wat bose planne teen U smee,

wat so vals teen U optree.

₂₁Moet ek u haters dan nie haat nie, Here,

moet ek nie 'n weersin hê in mense wat teen U in opstand is nie?

₂₂Ek haat hulle met 'n uiterste haat,

want hulle is ook my vyande.

₂₃Deurgrond my, o God, deurgrond my hart,

ondersoek my, sien tog my onrus raak.

₂₄Kyk of ek nie op die verkeerde pad is nie

en lei my op die beproefde pad!

₂Red my van mense wat sleg is, Here,

beskerm my teen mense wat geweld pleeg,

₃wat slegte dinge bedink

en elke dag vyandskap aanblaas.

₄Hulle tonge is so giftig soos slange,

hulle woorde so venynig soos adders. Sela

₅Hou my uit die mag van die goddeloses, Here,

beskerm my teen mense wat geweld wil pleeg,

wat planne maak om my uit die pad te kry.

₆Hovaardige mense stel vir my strikke,

hulle span toue om my te vang,

hulle stel 'n valstrik op my pad. Sela

₇Ek sê vir die Here: U is my God!

Here, luister tog na my smeekgebed.

₈O Here my God aan wie ek behoort,

my kragtige Redder,

U beskerm my wanneer die goddeloses my aanval.

₉Moet tog nie dat hulle hulle sin kry nie, Here,

moet tog nie dat hulle planne slaag nie. Sela

₁₀Dié wat my van alle kante bedreig, verhef hulle teen U;

laat hulle dreigemente hulleself tref.

₁₁Laat gloeiende kole op hulle val,

gooi hulle in modderputte

dat hulle nie weer daar uitkom nie.

₁₂Laat daar geen skindertong in die land wees nie,

laat onheil dié wat geweld pleeg, elke keer weer tref!

₁₃Ek weet, die Here behartig die regsaak van die hulpelose,

Hy sorg vir die reg van die arme.

₁₄Die regverdiges sal u Naam loof,

die opregtes sal by U woon.

Ek roep na U, Here, kom tog gou na my toe,

luister tog na my, ek roep na U.

₂Mag my gebed voor U wees soos 'n wierookoffer,

die uitstrek van my hande soos 'n graanoffer in die aand.

₃Sit 'n wag voor my mond, Here,

hou tog wag oor wat ek sê.

₄Hou my gedagtes weg van verkeerde dinge,

dat ek nie in sonde verval

saam met manne wat onreg doen nie,

en dat ek nie deelneem aan hulle feeste nie.

₅'n Regverdige kan my in liefde slaan en teregwys,

maar van die goddeloses sal ek nie eens gasvryheid aanvaar nie,

want my gebede is gedurig teen hulle boosheid gerig.

₆As hulle leiers van 'n krans afgegooi word,

sal hulle my hoor sê: “Goed so!”

₇Soos 'n land vol kluite lê as die ploeër dit oopbreek,

so sal hulle bene versprei lê by die bek van die doderyk.

₈Op U, Here my God aan wie ek behoort, is my oë gerig,

by U skuil ek, moenie dat my lewe wegkwyn nie.

₉Beskerm my teen die strik wat hulle vir my gestel het,

teen die valstrikke van dié wat onreg doen.

₁₀Laat die goddeloses gevang word in hulle eie nette,

maar laat my ongedeerd verbykom.

₂Ek roep na die Here om hulp,

ek smeek die Here om genade,

₃ek stort my klag voor Hom uit

en vertel Hom van my nood.

₄Ek het alle moed verloor,

U weet wat ek moes deurmaak.

Op die pad waar ek loop,

het hulle vir my 'n strik gestel.

₅Ek soek hulp, maar niemand wil help nie,

daar is vir my geen vlugkans nie

en niemand gee vir my om nie.

₆Ek roep na U om hulp, Here,

ek sê: “U is my toevlug,

buiten U het ek geen deel in die land van die lewendes nie!

₇Luister tog na my hulpgeroep,

want ek is magteloos.

Red my van my vervolgers,

want hulle is te sterk vir my.

₈Bevry my uit my gevangenskap,

dat ek u Naam kan loof.

Die regverdiges sal dankbaar om my kom staan

wanneer U aan my goed doen.”

Hoor my gebed, Here,

luister tog na my smeking.

U is getrou en regverdig,

antwoord my tog!

₂Moet tog nie 'n regsaak teen my begin nie,

want niemand wat leef, is voor U onskuldig nie!

₃'n Vyand vervolg my,

hy trap my in die grond,

hy hou my gevange in die donker.

Ek is soos iemand wat lankal dood is.

₄Ek het alle moed verloor,

ek is verslae.

₅Ek dink aan die verre verlede,

ek peins oor alles wat U gedoen het

en oor die werk van u hande dink ek na.

₆Ek strek my hande uit in gebed na U toe,

ek is voor U soos 'n uitgedorde land. Sela

₇Antwoord my tog gou, Here,

ek is heeltemal gedaan.

Moet tog nie van my af wegkyk

dat ek word soos dié wat sterwe nie.

₈Laat my elke môre u liefde ondervind,

want in U stel ek my vertroue.

Wys my die pad wat ek moet loop,

want my hoop is op U gevestig.

₉Red my van my vyande, Here,

want by U skuil ek.

₁₀Leer my om u wil te doen, want U is my God!

Laat u goeie Gees my op 'n gelyk pad lei.

₁₁Ter wille van u Naam, Here, laat my lewe.

U is regverdig, red my uit die nood.

₁₂Vernietig in u trou my vyande,

laat al my teëstanders omkom,

want ek is u dienaar.

Geloof sy die Here, Hy is my rots.

Hy leer my hande om oorlog te maak,

my vingers om te veg.

₂U is my krag en my skuilplek,

my veilige vesting en my redder,

my beskermer by wie ek skuil,

wat my volk aan my onderdanig maak.

₃Here, wat is 'n mens dat U hom sou wil ken,

'n mensekind dat U aan hom sou dink?

₄'n Mens, hoe verganklik is hy tog:

sy dae gaan soos 'n skaduwee verby.

₅Buig u hemele, Here, en daal neer,

raak die berge aan dat hulle rook!

₆Laat die weerligstrale blits en jaag die vyande uitmekaar,

stuur u pyle en jaag hulle op loop!

₇Strek u hand van bo af uit,

bevry my, red my uit die geweldige waters,

uit die mag van vreemdelinge

₈wie se woorde en dade leuens en bedrog is.

₉Ek wil tot u eer 'n nuwe lied sing, o God,

tot u eer wil ek sing met begeleiding van die lier,

₁₀U wat aan konings die oorwinning skenk,

wat u dienaar Dawid red.

₁₁Red my van die swaard wat my bedreig,

bevry my uit die mag van vreemdelinge

wie se woorde en dade leuens en bedrog is.

₁₂Mag ons seuns wees soos plante

wat hoog groei in hulle jeug,

ons dogters soos hoekpilare,

uitgebeitel soos vir 'n paleis.

₁₃Mag ons skure vol wees

en oorloop van kant tot kant.

Mag ons kleinvee in hulle duisende aanteel,

in hulle tienduisende vermenigvuldig op ons weivelde.

₁₄Mag ons beestrop 'n groot kalweroes lewer.

Mag ons nooit oorval en weggevoer word nie,

mag daar geen klaagkreet op ons pleine gehoor word nie.

₁₅Gelukkig is die volk met wie dit so gaan.

Dit gaan goed met die volk wie se God die Here is!

Ek wil u lof verkondig,

my God en Koning,

ek wil u Naam altyd loof.

₂Elke dag wil ek U loof,

ek wil u Naam altyd prys.

₃Die Here is groot, alle lof kom Hom toe,

sy grootheid is ondeurgrondelik.

₄Geslag na geslag prys wat U doen

en vertel van u magtige dade,

₅van die luister, die heerlikheid van u majesteit.

Ek wil getuig van u magtige dade,

₆sodat die mense oor u wonderdade sal praat.

Ek wil van u grootheid vertel.

₇Sonder ophou moet hulle u groot goedheid verkondig

en oor u reddingsdade jubel.

₈Genadig en barmhartig is die Here,

lankmoedig en vol liefde.

₉Die Here is vir almal goed

en barmhartig oor alles wat Hy geskep het.

₁₀Almal wat deur U geskep is, loof U, Here,

en u troue dienaars prys U!

₁₁Hulle vertel van u koninklike mag

en getuig van u groot krag.

₁₂Die mense moet weet van sy krag,

van sy koninklike mag en majesteit.

₁₃U koningskap is 'n koningskap vir alle tye,

u heerskappy strek oor die geslagte heen.

₁₄Die Here help almal op wat geval het.

Hy ondersteun dié wat bedruk is.

₁₅Die oë van almal is op U gerig,

en U gee hulle kos op hulle tyd.

₁₆U maak u hand oop

en skenk u guns in oorvloed aan al wat leef.

₁₇Die Here is regverdig in al sy handelinge,

getrou in alles wat Hy doen.

₁₈Die Here is naby almal wat Hom aanroep,

almal wat Hom in opregtheid aanroep.

₁₉Aan dié wat Hom dien, gee Hy wat hulle vra,

Hy hoor as hulle om hulp roep, en Hy red hulle.

₂₀Die Here beskerm almal wat Hom liefhet,

maar al die goddeloses verdelg Hy.

₂₁Ek sal die lof van die Here verkondig.

Laat al wat leef, sy heilige Naam vir altyd prys.

Ek wil die Here prys.

₂Ek wil die Here prys so lank ek lewe,

ek wil die lof van my God besing so lank ek daar is.

₃Moenie op magtiges vertrou nie,

nie op 'n mens nie;

hy kan jou nie red nie.

₄Sy asem verlaat hom, hy word weer grond

en sy planne is daarmee heen.

₅Dit gaan goed met die mens

wat sy hulp van die God van Jakob ontvang,

die mens wie se hoop gevestig is op die Here, sy God.

₆Die Here het die hemel en die aarde gemaak,

die see en alles daarin.

Hy bly vir altyd getrou,

₇Hy laat reg geskied aan verdruktes

en gee brood aan dié wat honger ly.

Die Here bevry die gevangenes,

₈die Here laat blindes sien,

Hy ondersteun dié wat bedruk is.

Die Here het die regverdiges lief.

₉Hy beskerm vreemdelinge

en help weeskinders en weduwees,

maar Hy versper die pad vir die goddeloses.

₁₀Die Here regeer vir altyd.

Sion, jou God regeer van geslag tot geslag.

Prys die Here!

Dit is goed om tot lof van ons God te sing,

dit is 'n genot om die loflied te sing wat Hom toekom.

₂Dit is die Here wat Jerusalem weer opbou,

wat die verstrooides van Israel bymekaarbring.

₃Hy genees die gebrokenes van hart

en verbind hulle wonde.

₄Hy besluit oor die getal van die sterre

en gee elkeen 'n naam.

₅Ons Here is groot en magtig,

sy kennis is onbegrens.

₆Die Here laat die hulpeloses weer opstaan,

maar die goddeloses verneder Hy tot in die grond.

₇Sing vir die Here 'n danklied,

sing tot eer van ons God met begeleiding van die lier.

₈Hy oordek die hemel met wolke,

Hy voorsien reën vir die aarde

en laat gras op die bergland uitspruit.

₉Hy gee aan die diere hulle weiding

en versorg die jong kraaie wat om kos skreeu.

₁₀Die Here het niks aan die krag van 'n perd

of die liggaamskrag van 'n soldaat nie,

₁₁maar Hy stel prys op dié wat Hom dien,

dié wat hulle hoop vestig op sy trou.

₁₂Loof die Here, Jerusalem,

prys jou God, Sion!

₁₃Hy het die sluitbalke van jou poorte sterk gemaak,

jou inwoners geseën,

₁₄Hy het in jou grondgebied vrede gegee,

jou met die beste graan gevoed.

₁₅As Hy die aarde 'n bevel gee,

word dit vinnig uitgevoer.

₁₆Hy gee sneeu so wit soos wol,

Hy strooi ryp uit soos as,

₁₇Hy laat dit haelstene reën.

Wie is bestand teen die koue wat Hy stuur?

₁₈Maar op sy bevel smelt alles weer;

as Hy die warm wind laat waai, dan loop die waters.

₁₉Hy maak sy woord aan Jakob bekend,

sy voorskrifte en bepalings aan Israel.

₂₀Dit het Hy vir geeneen van die ander nasies gedoen nie;

hulle ken sy bepalings nie.

Prys die Here!

Prys die Here vanuit die hemele,

prys Hom in die hoë hemel!

₂Prys Hom, alle engele,

prys Hom, alle hemelwesens!

₃Prys Hom, son en maan,

prys Hom, alle sterre!

₄Prys Hom, hoogste hemele,

en waters in die hoë hemelruim!

₅Laat hulle die Naam van die Here prys,

want Hy het beveel en hulle is geskep;

₆Hy het hulle vir altyd hulle vaste plek gegee,

vir hulle 'n orde neergelê waarbuite hulle nie kan beweeg nie.

₇Prys die Here van die aarde af,

seediere en al die oseane,

₈weerlig en hael, sneeu en miswolke,

stormwind wat sy opdrag gehoorsaam,

₉berge, al die heuwels,

vrugtebome, al die seders,

₁₀wilde diere, al die vee,

al wat kruip of vlieg,

₁₁konings van die aarde, alle volke,

vorste, alle regeerders van die aarde,

₁₂jong manne en meisies,

grysaards saam met seuns!

₁₃Laat hulle die Naam van die Here prys,

want sý Naam alleen is hoog verhewe,

sy majesteit strek oor die aarde en oor die hemel.

₁₄Hy het aan sy volk mag gegee.

Dit is die roem van al sy troue dienaars,

die Israeliete, die volk naby wie Hy is.

Prys die Here!

Sing 'n nuwe lied tot eer van die Here,

sing tot sy lof in die vergadering van sy troue dienaars.

₂Laat Israel hom verheug in sy Maker,

laat die volk van Sion jubel oor die Here hulle koning.

₃Laat hulle sy Naam prys met koordanse,

laat hulle speel tot sy eer op tamboeryn en lier.

₄Die Here is goed vir sy volk,

Hy kroon die hulpeloses met oorwinning.

₅Sy troue dienaars juig oor sy mag,

jubel selfs as hulle op hulle beddens gaan lê.

₆Die roem van God klink uit hulle mond,

en in hulle hand is die swaard, alkante geslyp,

₇waarmee hulle die nasies sal verslaan

en die volke sal straf.

₈Hulle sal die konings van daardie nasies met kettings vasbind,

hulle aansienlikes met ysterboeie,

₉en die vonnis aan hulle voltrek soos dit vasgestel is.

Dit sal die triomf wees van al die troue dienaars van God.

Prys die Here!

Prys God in sy heiligdom,

prys Hom hier onder sy magtige hemelgewelf!

₂Prys Hom oor sy kragtige dade,

prys Hom in sy magtige grootheid!

₃Prys Hom met die ramshoring,

prys Hom met harp en lier!

₄Prys Hom met tamboeryn en koordanse,

prys Hom met snaarinstrumente en fluite!

₅Prys Hom met simbale,

prys Hom met galmende simbale!

₆Laat alles wat asemhaal, die Here prys!

Prys die Here!