Slaap in vrede – 12 Mei 2020

Meeste van ons het ‘n aantal rituele aan die einde van elke dag. Miskien kyk jy die nuus en kyk deur jou Facebook. Lees ‘n boek. Neem die hond uit, borsel jou tande, sluit die deure. En dan wanneer jy in die bed klim, rol jy rond en bekommer jou oor die dag wat verby is, of oor die een wat voorlê.

Dawid wat hierdie psalm geskryf het, het die gevare van elke dag goed geken. Hy het baie bekommernisse in sy lewe ondervind, en hy het geweet dat sonder die Here daar geen veiligheid in lewe of dood is nie.

Miskien ondervind jy tans sommige van die bekommernisse van Psalm 4. Miskien lê jy in die nag wakker oor dinge wat in jou lewe gebeur. Miskien is jy bekommerd oor jou gesondheid, jou familie, jou werk, jou toekoms. Miskien vrees jy dit wat vir ons wag in die maande wat kom.

Die verse in die eerste deel van die psalm bied ons perspektief: “Hoe lank gaan julle my eer nog skend, mense, gaan julle valsheid liefhê en voorkeur gee aan leuens? Sela Besef tog dat die Here wonders gedoen het vir dié wat aan Hom getrou is. Die Here hoor as ek na Hom roep.” (Psalm 4:3-4)

Hierdie psalm gee ons selfs praktiese advies in vers 5: “dink in stilte daaroor na as jy gaan lê, en laat dit daarby!” Miskien is dit tyd vir nog ‘n ritueel. Spandeer elke aand tyd om jou Bybel te lees, en vra die Here om jou te help om te onthou om al jou probleme na Hom toe te neem. Dan, slaap in vrede want jy is nou in die hande van die Here. Dit is die God wie ons dien!

Gebed: Hemelse Vader, wees asseblief naby almal wat die moeilike uitdagings van die lewe ondervind. Skenk aan hulle die veiligheid en sekuriteit wat U ons deur ons Here Jesus gee. Amen