Troos uit die Woord – Dag 38

Die Here is my lig en my redder,

vir wie sou ek bang wees?

Die Here is my toevlug,

vir wie sou ek vrees?

₂As misdadigers op my afstorm om my dood te maak,

my teëstanders en my vyande,

dan is dit juis húlle wat struikel en val.

₃Al sou 'n leër teen my stelling inneem,

sal ek nie bang word nie.

Selfs al sou die aanval op my begin,

sal ek nog steeds vertroue hê.

₂Mag die Here u gebed verhoor op die dag van nood,

mag die Naam van die God van Jakob u beskerm.

₃Mag Hy u te hulp kom uit die heiligdom,

u bystaan uit Sion.

₈Sommige vertrou op strydwaens en ander op perde,

maar óns, ons vertrou op die Naam van die Here ons God.

₉Húlle sal struikel en val,

maar óns sal regop en vas bly staan.

₁₀Here, gee tog aan die koning die oorwinning.

Mag die Here ons gebed verhoor wanneer ons na Hom roep.

₂Net by God vind ek rus,

van Hom kom my redding.

₃Net Hy is my rots en my redding,

my veilige vesting, sodat ek vas en stewig staan.

₆Net by God vind ek rus,

want op Hom vertrou ek.

₇Net Hy is my rots en my redding,

my veilige vesting, sodat ek stewig staan.

₈God is my redding en my krag.

Hy is my rots, my sterkte,

God is my toevlug.

₉Vertrou altyd op Hom, my volk,

stort julle hart voor Hom uit!

God is vir ons 'n toevlug. Sela

₄Die dag as ek bang word,

vertrou ek net op U.

₅In God, wie se woord ek prys,

in God stel ek my vertroue, ek is nie bang nie.

Wat kan 'n blote mens aan my doen?

₉My ellende het nie ongemerk by U verbygegaan nie,

U het op my trane gelet.

In u boek staan hulle opgeteken.

₂Here, dit is oor die openbaring van u mag

dat die koning so bly is,

dit is oor die oorwinning wat U hom gegee het,

dat hy so jubel en juig.

₃Die wens van sy hart het U vervul.

Wat hy gevra het, het U hom nie geweier nie. Sela

₄U skenk hom voorspoed en geluk,

U plaas 'n goue kroon op sy kop.

₅Lewe het hy van U gevra;

U het hom dit gegee – 'n lang, lang lewe.

₆Omdat U uitkoms gegee het, is hy hoog in aansien,

met roem en eer het U hom oorlaai.

₇U maak hom altyd voorspoedig,

U skenk hom oorvloedige blydskap deur u nabyheid.

₈Die koning vertrou op die Here

en deur die trou van die Allerhoogste struikel hy nie.

₉U hand sal al u vyande vind,

u regterhand sal u haters tref.

₁₀Wanneer U verskyn, Here,

sal U hulle verteer soos in 'n oond.

In u toorn sal U hulle vernietig,

en die vuur sal hulle verteer.

₁₁U sal hulle kinders van die aarde af verdelg

en die mensheid verlos van hulle nageslag.

₁₂As hulle kwaad teen U beraam,

bose planne uitdink,

sal hulle niks uitrig nie.

₁₃Wanneer U met die boog na hulle mik,

slaan hulle op die vlug.

₁₄Laat u mag seëvier, Here,

dan sal ons u krag besing en daaroor roem.

₂Ek soek U, o God, my God,

ek dors na U;

ek smag na U

soos in 'n dor en droë land,

'n land sonder water.

₃Ek wil by U in die heiligdom wees

om daar u mag en grootheid te ondervind.

₄U troue liefde is meer werd as die lewe;

daarom sal ek U prys.

₅Ek sal U my lewe lank loof,

my hande ophef om u Naam te prys.

₆Soos elke keer wanneer ek u goeie gawes geniet,

sal ek U altyd roem met jubelende mond.

₇As ek aan U dink op my bed,

oor U peins in die nag, dan weet ek:

₈U is vir my 'n hulp,

en dan juig ek oor die beskerming onder u vleuels.

₉Ek bly altyd naby U,

u hand ondersteun my.

₁₀Maar hierdie mense wat my ondergang soek,

mag hulle wegsink in die dieptes van die aarde!

₁₁Mag hulle aan die swaard oorgegee word

en aas vir die jakkalse word!

₁₂Laat die koning hom in God verbly,

laat elkeen wat hom op God verlaat, Hom prys.

Die mond van die vals mens word toegestop.