Bybelleesrooster – Dag 183

₂Daardie dag moet julle sing van die goeie wingerd;

₃Ek, die Here, sorg daarvoor:

Ek lei dit gereeld nat,

dag en nag staan Ek wag daarby

sodat niemand dit kan beskadig nie.

₄Ek is nie kwaad vir my wingerd nie.

Niemand sal dit waag om dorings en dissels daarin te plant nie.

Maar soos in 'n oorlog sal Ek my wingerd plattrap

en heeltemal verbrand

₅as hy nie in my stad kom skuil nie.

Hy, Israel, moet met My kom vrede maak,

hy moet vrede met My kom maak!

₆In die dae wat kom, sal Jakob wortel skiet,

Israel sal groei en lote maak.

Die aarde sal vol word van hulle vrugte.

₇Die Here het sy volk nie geslaan

soos Hy hulle teëstanders geslaan het nie.

Hy het hulle ook nie doodgemaak,

soos Hy hulle moordenaars doodgemaak het nie.

₈Die Here het sy volk gestraf

deur hulle te verjaag en weg te dryf.

Met 'n sterk wind het Hy hulle weggewaai ooste toe.

₉As Jakob al sy altaarklippe fyn stamp

soos 'n mens 'n kalkklip fyn stamp,

as hy nie gewyde pale en wierookaltare vir sy afgode oprig nie,

sal daar versoening wees vir sy oortreding,

sal sy sonde van hom af weggeneem word.

₁₀Die versterkte stad lê verwoes:

'n plek sonder inwoners,

verlate soos die woestyn.

Dáár wei net kalwers,

en hulle vreet wat daar groei,

en dáár gaan hulle lê.

₁₁Die droë takke word afgebreek,

vrouens kom en maak vuur daarmee.

Israel is 'n volk sonder begrip van wat Ek doen.

Daarom sal sy Maker hom nie langer liefhê nie

en sal sy Skepper hom nie genadig wees nie.

₁₂Daardie dag sal die Here sy oes inbring

van die Eufraat af tot by die grens van Egipte,

en julle, Israeliete, sal die koringare wees wat één-één opgetel word.

₁₃Daardie dag sal die groot ramshoring geblaas word.

Dan sal almal aankom wat in Assirië verstrooi was,

ook dié wat na Egipte toe verjaag is.

Hulle sal die Here aanbid op die heilige berg in Jerusalem.

₁Ellende wag vir Samaria,

die kroon, die trots van die dronkaards van Efraim,

die roem van die drankverslaafdes,

die krans van verwelkte blomme,

dié stad hoog bokant die vrugbare vallei.

₂Die Here het iemand tot sy beskikking

wat sterk en magtig is

en wat dié kroon grond toe sal bring

soos 'n haelstorm, soos 'n vernietigende stormwind,

soos stortreëns uit 'n wolkbreuk.

₃Dié kroon, die trots van die dronkaards van Efraim,

sal met die voete vertrap word,

₄dié krans van verwelkte blomme

waaroor hulle roem,

die stad hoog bokant die vrugbare vallei

is soos 'n ryp voorvy:

wie hom sien, pluk hom en kyk skaars na hom

voor hy hom wegsluk.

₅Daardie dag sal die Here die Almagtige die kroon wees,

die krans waaroor dié sal roem

wat van sy volk oor is.

₆Hy sal aan dié wat reg moet spreek,

'n sin vir reg gee,

Hy sal krag gee aan dié wat die aanval moet afslaan

by die stadspoorte.

₇Maar ook die priesters en profete hier in Jerusalem

slinger en waggel van dronkenskap;

hulle slinger, hulle is beneweld,

hulle waggel van die wyn en die drank;

die profete slinger wanneer hulle gesigte moet uitlê,

die priesters loop twee rye spore

wanneer hulle regsbeslissings moet maak.

₈Al die tafels is vol braaksel,

daar is nie 'n plek wat nie bemors is nie.

₉Hulle sê: “Vir wie wil Jesaja leer,

vir wie wil hy die boodskap uitlê

wat hy sou gehoor het?

Ons is nie kinders wat pas gespeen is,

wat nou net van hulle ma's se borste af

weggevat is nie!

₁₀Wat ons van hom hoor,

is 'n bietjie brabbeltaal hier

en 'n bietjie brabbeltaal daar!”

₁₁Hy sál in die vervolg met dié volk praat

met stotterende woorde, in 'n vreemde taal.

₁₂Hy het vir hulle gesê: Die rus moet hier wees,

gee hier vir die vermoeide rus,

hier is die plek vir vrede!

Maar hulle wou nie luister nie.

₁₃Die woord van die Here tot hulle sal nou wees

'n bietjie brabbeltaal hier

en 'n bietjie brabbeltaal daar,

sodat hulle sal struikel waar hulle ook gaan,

verstrik sal raak, gevang en vernietig sal word.

₁₄Hoor die woord van die Here, julle ligsinniges

wat regeer oor hierdie volk in Jerusalem!

₁₅Julle sê: “Ons het 'n ooreenkoms met die dood,

ons het 'n verstandhouding met die doderyk;

wanneer die vloed aangestroom kom,

sal hy ons nie tref nie.

Ons het die leuen ons skuilplek gemaak,

ons kruip veilig weg agter die valsheid!”

₁₆So sê die Here my God:

Ek gaan in Sion 'n klip neersit,

'n uitgesoekte klip, 'n hoekklip

wat fondament aan fondament sal sluit.

Wie op My vertrou, hoef nie te vlug nie.

₁₇Ek maak geregtigheid die maatstaf,

regverdigheid die toets.

Die hael sal julle skuilplek van leuens uitwis,

die water sal julle wegkruipplek wegspoel.

₁₈Julle ooreenkoms met die dood word opgehef,

julle verstandhouding met die doderyk sal nie bly staan nie.

Wanneer die vloed aangestroom kom,

sal julle in hom ondergaan.

₁₉Hy sal julle meesleur elke keer as hy kom,

en hy sal dag vir dag kom,

dag en nag.

Dan sal dit louter verskrikking wees

om die boodskap uit te lê wat ontvang is.

₂₀Die bed sal te kort wees om reguit op te lê,

die kombers te smal om jou daarmee toe te maak.

₂₁Soos by Perasimberg sal die Here Hom gereed maak,

soos in die laagte by Gibeon sal Hy Hom in sy toorn voorberei

om te doen wat Hy wil doen,

om die taak te verrig waartoe Hy besluit het,

en dit is iets vreemds wat Hy wil doen,

dit is 'n uitsonderlike taak.

₂₂Staak julle ligsinnigheid

sodat die bande nie nog stywer om julle getrek word nie!

Ek het by die Here my God, die Almagtige, gehoor

dat dit by Hom vasstaan:

Hy gaan die hele land verwoes.

₂₃Gee aandag, luister na wat ek sê,

let op, luister na my woorde:

₂₄Hou 'n boer aan met ploeg as hy wil saai?

Hou hy aan grond breek en vore trek?

₂₅As hy die grond gelyk gemaak het,

saai hy mos swartkomyn en komyn,

sit hy koring en gars in waar dit moet kom

en spelt aan die kante.

₂₆Sy God leer hom en gee hom die kennis

hoe om alles te doen soos dit hoort.

₂₇Swartkomyn word mos nie met 'n slee uitgedors

of komyn met wawiele uitgetrap nie.

Swartkomyn en komyn word met 'n stok uitgeslaan.

₂₈Graan word gemaal vir brood,

maar 'n mens hou nie eindeloos aan om dit te laat trap

deur wawiele en deur trekdiere

tot dit fyn is nie.

₂₉Ook dit is iets wat van die Here die Almagtige af kom;

kennis wat van Hom kom, is wonderbaar

en laat alles voorspoedig verloop.

₁Ellende wag vir Ariël, Ariël, die stad

wat deur Dawid beleër is.

Laat die jare maar op mekaar volg,

laat die feestye hulle verloop neem,

₂Ek sal Ariël beleër

en daar sal ellende op ellende in hom wees,

hy sal vir My 'n vuurmaakplek wees.

₃Ek sal jou van alle kante af beleër,

Ek sal wagposte inrig rondom jou

en beleëringswalle teen jou opgooi.

₄Jy sal val, jy sal uit die grond uit praat,

jou woorde sal dof uit die stof uit opklink,

jou stem sal uit die grond uit kom

soos dié van 'n spook,

jy sal uit die stof uit mompel.

₅Maar die hordes vyande wat jy het, sal word soos fyn stof,

dié wrede hordes sal soos kaf weggewaai word.

Skielik, in 'n oogwink,

₆sal die Here die Almagtige Hom oor jou ontferm

met donderslae en aardbewings, met 'n magtige dreuning,

met storms en orkane, met verterende vuur.

₇Dit sal met al dié nasies gaan soos in 'n slegte droom,

dié hordes wat teen Ariël oorlog maak,

almal wat hom en sy vestings aanval

en hom beleër:

₈dit sal met hulle gaan soos wanneer iemand wat honger is

en droom hy eet, nog honger is as hy wakker word;

soos wanneer iemand wat dors is

en droom hy drink water, nog kragteloos is,

nog versmag van dors as hy wakker word.

So sal dit gaan met al dié nasies,

dié hordes wat oorlog maak teen Sionsberg.

₉Nou staan julle verdwaas en verstom;

julle sien niks, julle oë is toe;

julle is dronk maar nie van wyn nie,

julle waggel sonder dat julle iets gedrink het,

₁₀want die Here het julle in 'n diep slaap laat wegsak:

die profete moes julle oë wees

en die sieners julle koppe,

maar julle oë is nou toe

en daar is 'n doek oor julle koppe.

₁₁Elke openbaring is nou vir julle

soos die woorde in 'n verseëlde boek:

jy gee dit vir iemand wat kan lees

en jy vra: “Lees dit asseblief vir my,”

en hy sê: “Ek kan nie, die boek is verseël.”

₁₂Of jy gee die boek vir iemand wat nie kan lees nie

en jy vra: “Lees dit asseblief vir my,”

en hy sê: “Ek kan nie lees nie.”

₁₃Die Here het gesê:

Hierdie volk is naby My met die mond,

hulle eer My met wat hulle sê,

maar hulle hart is ver van My af,

hulle dien My soos mense dit wil hê,

nie soos Ek wil nie.

₁₄Daarom gaan Ek nog ongehoorder dinge doen met hierdie volk:

die een ongehoorde ding na die ander,

sodat die wysheid van sy wyse manne sal verdwyn,

die verstand van sy verstandige mense tot niet sal gaan.

₁₅Ellende wag vir dié wat dink

hulle kan hulle planne diep wegsteek vir die Here,

hulle wat besig is om dinge in die donker te doen

en dink: wie sien ons? Wie weet van ons?

₁₆Julle is agterstevoor met alles,

asof die pottebakker die klei is.

Die maaksel kan mos nie van sy maker sê:

“Hy het my nie gemaak nie”;

die kleipot kan mos nie van die pottebakker sê:

“Hy weet nie wat hy doen nie.”

₁₇Nog net 'n baie kort tydjie,

dan verander die Libanon in 'n vrugteboord

en word die vrugteboord so dig

dat dit vir 'n bos aangesien word.

₁₈Daardie dag sal die dowes kan hoor

wat daar in die boek staan,

en sal die blindes weer kan sien

uit die donker, uit die duisternis uit.

₁₉Die mense in nood sal weer bly wees oor die Here,

die arm mense sal juig oor die heilige God van Israel.

₂₀Daar sal nie meer wreedaards wees nie;

dit sal klaar wees met die ligsinniges,

elkeen wat altyd gereed was om onreg te doen,

sal uitgeroei word,

₂₁ook dié wat sommer mense tot oortreders verklaar het,

strikke gespan het vir dié wat reg wou laat geskied,

en onskuldige mense hulle reg ontneem het

deur vals getuienis.

₂₂So sê die Here, Hy wat vir Abraham verlos het,

Hy sê oor Jakob:

Die nageslag van Jakob sal hulle nie meer hoef te skaam nie,

hulle sal nie meer bleek van verleentheid hoef te word nie,

₂₃want wanneer hulle die kinders sien wat Ek aan hulle gee,

sal hulle my heilige Naam eer;

hulle sal die heilige God van Jakob eer,

hulle sal ontsag hê vir die God van Israel.

₂₄Dan sal dié wat gedwaal het, insig kry,

en dié wat gedurig foutgevind het, sal hulle laat leer.