Bybelleesrooster – Dag 122

In my nood het ek na die Here geroep

en Hy het my gebed verhoor.

₂Red my uit die mag van leuenaars, Here,

uit die mag van bedrieërs.

₃Wat sal God aan jou doen, jou bedrieër?

Hoe sal Hy teen jou optree?

₄Hy sal jou tref met die skerp pyle van 'n krygsman,

met gloeiende kole.

₅Hoe ellendig was dit toe ek as vreemdeling in Mesek gewoon het

en tussen die inwoners van Kedar gebly het!

₆Te lank moes ek woon by mense wat vrede haat.

₇Ek het vrede begeer,

maar sodra ek iets gesê het, was hulle op oorlog uit!

Ek kyk op na die berge:

waarvandaan sal daar vir my hulp kom?

₂My hulp kom van die Here

wat hemel en aarde gemaak het.

₃Hy sal nie toelaat dat jy struikel nie;

Hy wat jou beskerm, slaap nooit nie.

₄Waarlik, die Beskermer van Israel sluimer nie in nie

en Hy slaap nie.

₅Die Here beskerm jou,

die Here bewaar jou van alle gevare.

₆Bedags sal die son jou nie steek nie

en snags sal die maan jou nie kwaad doen nie.

₇Die Here sal jou beskerm teen alle gevaar,

jou lewe sal Hy beskerm.

₈Hy sal jou beskerm waar jy ook gaan,

nou en vir altyd.

Ek was bly toe hulle vir my gesê het:

“Kom ons gaan na die huis van die Here toe.”

₂En nou is ons hier binne-in jou, Jerusalem!

₃Jerusalem is die stad wat stewig gebou is,

₄waarheen die stamme kom,

die stamme van die Here.

Dit is 'n voorskrif vir Israel

om die Naam van die Here hier te loof.

₅Hier word reg gespreek,

hier lewer die koning sy uitsprake,

die koning uit die geslag van Dawid.

₆Bid dat Jerusalem vrede mag hê,

dat hulle wat hom liefhet, rustig mag woon.

₇Mag daar vrede wees binne jou mure,

rus in jou wonings.

₈Ter wille van my broers en my vriende

wens ek jou vrede toe.

₉Ter wille van die huis van die Here ons God

bid ek dat dit met jou goed sal gaan.

Ek sien na U op,

U wat uit die hemel heers.

₂Soos die oë van 'n slaaf

gerig is op die hand van sy eienaar,

soos die oë van 'n slavin

gerig is op die hand van haar eienares,

so is ons oë gerig op die Here ons God,

totdat Hy Hom oor ons ontferm.

₃Ontferm U oor ons, Here, ontferm U oor ons,

want ons het meer as genoeg veragting gehad,

₄meer as genoeg spot van oormoedige mense,

veragting van hovaardiges.

As die Here ons nie gehelp het nie,

dit moet Israel bely,

₂as die Here ons nie gehelp het

toe mense ons aangeval het nie,

₃dan het hulle ons lewendig verslind

toe hulle woede teen ons ontvlam het;

₄dan het die waters ons weggespoel

en die vloed ons oorweldig;

₅dan het die skuimende waters ons oorweldig.

₆Aan die Here kom die lof toe:

Hy het nie toegelaat dat ons hulle prooi word nie.

₇Ons is bevry soos 'n voël uit die wip van 'n voëlvanger;

die wip het gebreek en ons was vry!

₈Ons hulp kom van die Here

wat hemel en aarde gemaak het.

Dié wat op die Here vertrou,

is soos Sionsberg

wat nie wankel nie

en altyd vas bly staan.

₂Soos die berge Jerusalem aan alle kante beskerm,

so beskerm die Here sy volk,

nou en vir altyd.

₃Oor die grondgebied van die regverdiges

sal 'n goddelose nie die mag kry nie,

sodat die regverdiges nie in misdaad verval nie.

₄Here, doen goed aan dié wat goed is,

die opregtes van hart!

₅Maar dié wat die verkeerde pad loop,

mag die Here hulle vernietig

saam met dié wat onreg doen.

Mag daar vir Israel vrede wees!

Toe die Here die lot van Sion verander het,

was dit vir ons soos 'n droom.

₂Ons het gelag en gesing.

Onder die nasies het hulle gesê:

“Die Here het groot dinge aan hierdie mense gedoen.”

₃Die Here hét groot dinge aan ons gedoen;

ons was bly.

₄Verander tog ook nou ons lot, Here,

soos U droë spruite in die Suidland

in waterstrome verander.

₅Wie met trane saai, sal die oes met gejuig inbring.

₆Al loop hy en huil terwyl hy die saaisak dra,

hy kom juigend terug

terwyl hy sy gerwe dra.

As die Here die huis nie bou nie,

swoeg dié wat daaraan bou, tevergeefs.

As die Here die stad nie beskerm nie,

waak dié wat dit beskerm, tevergeefs.

₂Tevergeefs dat julle vroeg opstaan

en laat gaan slaap

om met moeite 'n bestaan te maak.

Vir dié wat Hy liefhet,

gee die Here dit in hulle slaap.

₃Seuns is geskenke van die Here,

kinders word deur Hom gegee.

₄Soos pyle in die hand van 'n krygsman,

so is seuns wat gebore is toe hulle vader nog jonk was.

₅Dit gaan goed met die man wat sy pylkoker so gevul het!

Sulke mense het niks te vrees

as hulle met die vyand in die stadspoort onderhandel nie.

Dit gaan goed met elkeen wat die Here dien

en sy wil doen.

₂Die vrug van jou arbeid sal jy geniet,

gelukkig en voorspoedig sal jy wees.

₃Jou vrou is in jou huis soos 'n vrugbare wingerdstok,

jou seuns is rondom jou tafel soos jong olyfboompies!

₄Kyk, so word die man geseën wat die Here dien.

₅Mag die Here jou seën uit Sion,

dat jy die voorspoed van Jerusalem kan aanskou

al die dae van jou lewe,

₆en dat jy jou kindskinders mag sien.

Mag daar vir Israel vrede wees!

Hulle het my van jongs af swaar verdruk,

dit moet Israel sê,

₂hulle het my van jongs af swaar verdruk,

maar hulle kon my nie onderkry nie.

₃Hulle het van my rug 'n ploegland gemaak

en daar lang vore op getrek.

₄Die Here is regverdig,

Hy het die bande losgesny

waarmee die goddeloses my gebind het.

₅Mag almal wat vir Sion haat, self tot niet gaan,

₆mag hulle wees soos gras op 'n dak:

dit verdroog nog voor dit behoorlik uitgespruit het

₇en daar is niks om af te sny

en in bondels weg te dra nie.

₈Niemand wat daar verbygaan, sal die groet:

“Die Here het julle geseën,

ons seën julle in die Naam van die Here,”

kan uitspreek nie.

Uit die dieptes roep ek na U, Here,

₂luister tog na my, Here,

hoor tog my hulpgeroep.

₃As U ons sondes in aanmerking sou neem, Here,

wie sou dan nog bestaan?

₄Maar by U ís daar vergifnis:

daarom word U steeds gedien.

₅Ek stel my vertroue in die Here, ek vertrou op Hom,

ek wag op die vervulling van sy woord.

₆Ek wag op die Here

meer as wat die wagte op die môre wag,

wagte op die môre.

₇Wag op die Here, Israel,

want by die Here is daar troue liefde,

by Hom is die verlossing seker.

₈Hy alleen sal Israel verlos

van al sy sondes.

Selfverheffing en hoogmoed

is daar nie by my nie, Here.

Ek maak my nie besorg oor groot dinge nie,

dinge wat bo my vermoë is.

₂Ek het rus en kalmte gevind.

Soos 'n kindjie wat by sy moeder tevredenheid gevind het,

so het ek tevredenheid gevind.

₃Wag op die Here, Israel,

nou en vir altyd.

Dink tog aan Dawid, Here,

aan alles wat hy deurgemaak het,

₂aan die eed wat hy teenoor die Here afgelê het,

sy gelofte aan die magtige God van Jakob:

₃“Ek sal nie in my slaapkamer ingaan nie

en nie op die bed wat vir my reggemaak is, gaan lê nie,

₄ek sal my geen slaap gun nie,

en sal nie eens insluimer nie,

₅totdat ek 'n plek vir die Here gereed gemaak het,

'n woning vir die magtige God van Jakob!”

₆Ons het van die verbondsark gehoor in Efrata,

ons het dit gevind in die Jaärsveld.

₇Kom ons gaan sy woning binne,

kom ons buig daar in aanbidding voor Hom.

₈Kom na u rusplek toe, Here,

U en die ark, die teken van u mag.

₉Gee aan u priesters die oorwinning,

laat u troue dienaars juig.

₁₀Ter wille van u dienaar Dawid,

moet tog nie u gesalfde verstoot nie.

₁₁Die Here het 'n eed teenoor Dawid afgelê,

en dit staan vas, Hy sal daarvan nie afwyk nie:

“Ek sal een van jou eie seuns in jou plek laat koning word.

₁₂As jou nakomelinge hulle aan my verbond hou

en aan die verordeninge wat Ek hulle leer,

sal ook hulle seuns vir altyd op jou troon heers.”

₁₃Ja, die Here het Sion gekies

en dit vir Hom as woning begeer:

₁₄“Dit is my rusplek vir altyd;

hier wil Ek woon, dit is my begeerte.

₁₅Ek sal Sion ryklik seën met wat hy nodig het,

aan sy armes voedsel in oorvloed skenk.

₁₆Ek sal aan sy priesters die oorwinning gee

en my troue dienaars sal juig.

₁₇Daar sal Ek die heerskappy vir Dawid vestig,

vir my gesalfde 'n nageslag op die troon verseker.

₁₈Sy vyande sal Ek magteloos laat toekyk,

maar sý kroon sal bly skitter.”