Nyl

Die Nyl is een van die langste riviere in die wêreld. Die rivier ontspring as die “Blou Nyl” in die Tanameer in Etiopië en as die “Wit Nyl” in die Victoriameer. Hierdie twee riviere vloei dan na die noorde waar dit in Khartoem, die hoofstad van Soedan, saamvloei. Daarna vloei die Nyl verder na die noorde deur Egipte, waar dit in die Middellandse See uitmond.

Die naam “Nyl” is van Grieks afkomstig. In die Ou Testament is daar nie ʼn naam vir die Nyl nie, maar word daar na die Nyl verwys deur die gebruik van die Egiptiese leenwoord je’or wat “rivier” beteken.