Liefdesappel

Die liefdesappel is verwant aan die aartappel en die tamatie. Dit is beskou as ʼn vrug wat seksuele begeertes kon opwek. Daarom speel dit ʼn belangrike rol in ʼn verhaal oor Ragel en Lea.

Die liefdesappel groei in klipperige grond. Verskeie dele van hierdie plant bevat giftige stowwe. Die soet vrug het ʼn bedwelmende en ontspannende uitwerking. Dit het ook ʼn heerlike geur, soos ons lees in Hooglied 7:13.

In die oudheid is aanvaar dat liefdesappels seksuele begeertes opgewek het. Daardie idee is waarskynlik as gevolg van die plant se bedwelmende effek, en uit die feit dat die wortels mensagtige vorms kon hê.

Die bekendste verhaal in die Bybel waarin liefdesappels vermeld word, word aangetref in Genesis 30:14-17. In die oestyd vind Ruben, die oudste seun van Jakob en Lea, liefdesappels in die veld en gee dit aan sy moeder.

Ragel wil ook daarvan hê, maar Lea is net bereid om vir haar daarvan te gee indien Jakob toegelaat word om die nag by haar deur te bring. Ragel stem in, en daardie nag raak Lea swanger met haar vyfde seun.