Lier

ʼn Lier behoort tot die familie van snaarinstrumente. Dit is een van die bekendste instrumente in die Bybel. Koning Dawid is byvoorbeeld bekend daarvoor dat hy die lier (of harp) baie mooi kon bespeel. Die Hebreeuse woord vir lier is kinnor.

Die snare van die lier is tussen twee “arms” gespan. Aan die onderkant was die klankkas. Die snare is van skaapderms gemaak. Dit het aan die lier ʼn ligter klank gegee. 

Liere het tussen drie en elf snare gehad, maar oor die algemeen minder as ʼn harp. In Mesopotamië was die lier ʼn groot instrument, maar in Sirië en Anatolië was dit ʼn kleiner instrument.

Die lier en die harp is dikwels saam gebruik om musiek te maak.

Die lier is gespeel tydens feeste binne en buite die tempel, asook tydens rougeleenthede (Job 30:31). 

Prostitute het hulself ook op die lier begelei (sien Jesaja 23:15-16).