Hiskia se tonnel

2 Konings 20:20 en 2 Kronieke 32:30 noem beide die tonnel wat koning Hiskia gebou het om water na die stad te gelei. Dit is waarskynlik aangespoor deur die feit dat koning Sanherib van Assirië gedreig het om Jerusalem te beleër.

ʼn Tonnel van ongeveer 532 meter is ontdek wat moontlik rondom die tyd van Hiskia dateer. Die tonnel maak deels gebruik van Warren se Skag.

Die tonnel is van twee kante deur twee spanne arbeiders gegrawe. ʼn Inskripsie in Hebreeus wat die voltooiing van die tonnel herdenk, is gevind op die muur van die tonnel waar die twee spanne by mekaar uitgekom het. 

Dit is moontlik dat hierdie tonnel Hiskia se tonnel was, maar dit kan nie definitief bewys word nie. Hiskia se naam word nie in die inskripsie vermeld nie.