Aartsengel

In die Bybel is aartsengele ʼn spesiale en belangrike groep engele. Ná die Babiloniese ballingskap het die mening posgevat dat daar ʼn hiërargie onder engele bestaan. Bo-aan hierdie hiërargie was die aartsengele. Hulle word nie in die Ou Testament vermeld nie, maar kom wel voor in die Deuterokanonieke boeke, en word twee maal in die Nuwe Testament genoem (1 Tessalonisense 4:16; Judas 1:9).

Daar bestaan verskillende tradisies omtrent die presiese aantal aartsengele. Die getal sewe word dikwels genoem. Volgens die boek Henog word hulle Uriël, Rafael, Raguel, Migael, Sariël, Gabriël en Jeramiël genoem. Van die sewe kom slegs Migael en Gabriël in die bybelse kanon voor.