Bergrede: Konteks

Die bergrede is ʼn samestelling deur Matteus op grond van die uitsprake van Jesus. In die Evangelie funksioneer die toespraak as ʼn opsomming van Jesus se onderrig.

Matteus het die preek op ʼn weldeurdagte wyse by sy Evangelie ingewerk. Dit is duidelik uit die volgende:

In sy Evangelie plaas Matteus groot klem op dissipelskap van Jesus. Die belangrikste vir hom is om die lewensreëls wat Jesus gee, toe te pas. Dit word ook duidelik uit die gedeelte waarin Jesus sy onderrig afsluit: die oordeel van die Seun van die mens in Matteus 25:31-46. Hierdie toneel van die laaste oordeel kom nie in die ander Evangelies voor nie. Hier onthul Jesus die maatstaf wat sy hele onderrig opsom:

“Dit verseker Ek julle: Vir sover julle dit aan een van die geringste van hierdie broers van My gedoen het, het julle dit aan My gedoen” (Matteus 25:40).

Die deugdes wat Jesus aan die begin van die bergrede aanprys (soos nederigheid, sagmoedigheid en barmhartigheid) is, saam met die praktiese maatstaf in Matteus 25, Jesus se onderrig in ʼn neutedop.