Apokaliptiese Literatuur: Openbaring

Die boek Openbaring is vir Christene in die Romeinse provinsie Asië, in hedendaagse Turkye, geskryf. Die boek neem standpunt in teen die mag van Rome, in besonder die Romeinse keiserkultus.

Rome en die keiserkultus word uitgebeeld as die diere met ʼn oorweldigende slegte invloed (sien Openbaring 13), wat deur die duiwel aan hulle gegee is (sien Openbaring 12). Die diere span hulle mag teen Christene in.

Die agtergrond is die vervolging van Christene gedurende die bewind van die Romeinse keiser, waarskynlik Domitianus of Trajanus (tussen 90 en 120 n.C.)

Die outeur van Openbaring wil Christene met sy skrywe bemoedig. Hulle moenie deelneem aan die keiseraanbidding nie en moet volhard ten spyte van die vervolging. Dit is op die oomblik swaar en moeilik, en daar lê nog rampe voor. Maar daar sal ʼn ommekeer plaasvind en dan sal die koninkryk van God kom.