1 Timoteus: Beoogde lesers

Die eerste brief aan Timoteus is een van die “pastorale briewe”. Volgens die inleiding is hierdie briewe gerig aan Paulus se nabye medewerkers: Timoteus en Titus. Maar hierdie briewe het altyd ’n geslag leermeesters ná Paulus in die oog. Dit is duidelik uit die sake waaraan aandag gegee word in die briewe.

Hierdie leermeesters bied leierskap aan die gemeenskappe, maar hulle kan nie (langer) vir advies vra van Paulus en sy medewerkers nie. Daar word duidelike riglyne aan hulle verskaf in die pastorale briewe. Hoewel die persoonlike waarskuwings en advies oënskynlik vir Timoteus en Titus bedoel is, is dit in werklikheid vir die leiers in die gemeenskappe bedoel (bv 1 Timoteus 4:11-16; 2 Timoteus 3:14-17; Titus 2:7-8).