2 Korintiërs: Struktuur

Die tweede brief aan die Korintiërs is een van die mees persoonlike briewe wat Paulus geskryf het.

Die tweede brief aan die Korintiërs begin met ʼn redelike standaard-inleidingsformule wat die afsender bekendstel, asook dié aan wie dit gerig is en ʼn groeteboodskap.
Volgende het 2 Korintiërs 1:15 – 2:13 te make met verskeie probleme, soos die veranderde reisplanne en die straf wat opgelê moet word aan diegene wat Paulus leed aangedoen het.
Gewoonlik word 2 Korintiërs 2:14 – 7:4 beskou as Paulus se verdediging van sy apostelamp, maar die teks moet eintlik ook gesien word as Paulus se poging om verhoudings met die Korintiërs te herstel.
In hoofstukke 8 en 9 moedig Paulus die Korintiërs aan om mildelik by te dra tot die dankoffer vir die gemeente in Jerusalem.
In 2 Korintiërs 10:1 – 13:10 poog Paulus om die Korintiërs in skerp taal te oortuig om hulle rug op die valse apostels te draai.
In 2 Korintiërs 13:11-13 sluit Paulus sy brief af met ʼn groeteboodskap en die standaardseëngroet, wat steeds vandag in gemeentes gebruik word.