1 Samuel: Struktuur

1 Samuel speel af in die oorgangsperiode tussen die tyd van die rigters en die tyd van die konings. In die oorweging van die samestelling van 1 Samuel se teks, moet ons ook 2 Samuel 1 insluit. In 1 Samuel 1 tot 2 Samuel 1 kan drie dele onderskei word:

Die eerste deel (1 Samuel 1 – 8) begin met die geboorte van Samuel. Samuel se seuns blyk egter nie geskikte persone te wees om hulle pa as rigter op te volg nie. Daarom vra die Israeliete vir ʼn koning. Samuel stem teësinnig in. 

Die tweede deel (1 Samuel 9 – 16) vertel hoe Saul deur God opdrag gegee is om koning te wees en deur die volk aangestel word. Hy is egter ongehoorsaam aan God en daarom sal sy nageslag nie die koninklike lyn voortsit nie.

Die derde deel (1 Samuel 16 – 2 Samuel 1) beskryf Saul se agteruitgang en die opkoms van Dawid as die toekomstige koning. Saul word deur God verwerp en Dawid word as koning gesalf. Hulle liefde-haat-verhouding ontwikkel onvermydelik in ʼn magstryd. Saul se kinders, Jonatan en Mikal, skaar hulle by Dawid. Wanneer Saul en Jonatan in die oorlog met die Filistyne omkom, is Dawid uiteindelik in staat om op die troon aanspraak te maak.