Regspraak in die Nuwe Testament

Judea was deel van die Romeinse Ryk en was daarom onderworpe aan Romeinse wetgewing. Maar daar was ook ʼn Joodse, godsdienstige hof wat reg gespreek het oor interne Joodse sake: die Sanhedrin. Die Romeinse hof het egter die hoogste gesag verteenwoordig.

Jesus en Paulus was die twee bekendste mense uit die Nuwe Testament wat met die Romeinse wette te doen gekry het.

Volgens die Evangelies is Jesus eers deur die Sanhedrin veroordeel, maar daarna is hy ook na die Romeinse heerser, Pontius Pilatus, gestuur. Dit was Pilatus se besluit dat Jesus gekruisig moes word.

Paulus het ook tereggestaan voor die Romeine. Paulus was ʼn Romeinse burger en het dus sekere regte gehad. Daarom kon hy nie geboei of gegesel word nie. Hy het ook die reg gehad om in die stad Rome verhoor te word, en hy het van daardie reg gebruik gemaak. Hy is uiteindelik onder huisarres in Rome geplaas. Die Bybel sê nie of Paulus gevolglik veroordeel is nie, maar dit is baie waarskynlik.