Geserkalender

Tydens opgrawings in Geser in 1908 is ʼn kalksteentablet ontdek met ʼn moontlike kalender daarop. Die tablet is omtrent 12 by 7 sentimeter groot en dateer uit die tiende eeu v.C. Die teks is in oud-Hebreeus geskryf.

Op die kalksteentablet word maandelikse en tweemaandelikse periodes genoem. Elke periode bevat ʼn beroep wat met landbou verband hou, soos oes, plant, of die produksie van spesifieke gewasse soos vlas.

Wetenskaplikes is verdeeld oor die vraag of die tablet ʼn kalender of iets anders is. Dit kon ook ʼn skryfoefening wees, ʼn teks wat gebruik is om belasting vir boere te hef, of die teks van ʼn gewilde (kinder)lied.