PSALMS 67

₂Mag God ons genadig wees en ons seën,

mag Hy tot ons redding verskyn, Sela

₃sodat sy dade oor die wêreld heen bekend mag word,

sy reddende krag onder alle nasies.

₄Mag die volke U loof, o God,

mag al die volke U loof!

₅Mag die nasies bly wees en jubel

omdat U hulle regverdig regeer

en hulle op die aarde lei. Sela

₆Mag die volke U loof, o God,

mag al die volke U loof!

₇Die land het sy oes gelewer.

God, ons God, het ons geseën.

₈God het ons geseën.

Die mense op die hele aarde moet Hom eer.