PSALMS 101

Ek wil sing van u troue liefde en u geregtigheid,

ek wil 'n lied sing tot u eer, Here.

₂Ek wil my daaraan wy om opreg te lewe.

Wanneer kom U na my toe?

In my huis wil ek lewe in opregtheid,

₃niks wat sleg is, wil ek nastreef nie.

Ek haat wat verkeerd is.

Dit mag geen houvas op my hê nie.

₄Valsheid wil ek van my af weg hou,

van kwaad wil ek niks weet nie.

₅Wie sy naaste beskinder, wil ek uitwis.

Hoogmoed en vermetelheid verdra ek nie.

₆Ek kies as my amptenare

dié in die land wat op God vertrou;

die man wat opreg lewe,

hy kan in my diens wees.

₇Geen bedrieër sal in my paleis diens doen nie,

geen leuenaar kan my dien nie.

₈In my daaglikse regspraak sal ek al die goddeloses in die land uitwis,

almal wat onreg doen uit die stad van die Here uitroei.