MATTEUS 1

₁Die geslagsregister van Jesus Christus, die Seun van Dawid, die seun van Abraham:

₂Abraham was die vader van Isak, Isak van Jakob, en Jakob van Juda en sy broers; ₃Juda was die vader van Peres en Serag by Tamar, Peres van Gesron, en Gesron van Ram; ₄Ram was die vader van Amminadab, Amminadab van Nagson, en Nagson van Salmon; ₅Salmon was die vader van Boas by Ragab, Boas van Obed by Rut, Obed van Isai; ₆Isai was die vader van koning Dawid.

Dawid was die vader van Salomo by die vrou van Urija; ₇Salomo was die vader van Rehabeam, Rehabeam van Abia en Abia van Asa; ₈Asa was die vader van Josafat, Josafat van Joram, en Joram van Ussia; ₉Ussia was die vader van Jotam, Jotam van Agas, en Agas van Hiskia; ₁₀Hiskia was die vader van Manasse, Manasse van Amon, en Amon van Josia; ₁₁Josia was die vader van Jojagin en sy broers. Toe is die volk weggevoer na Babilonië toe.

₁₂En na die Babiloniese ballingskap was dit so: Jojagin was die vader van Sealtiël, en Sealtiël van Serubbabel; ₁₃Serubbabel was die vader van Abihud, Abihud van Eljakim, en Eljakim van Asor; ₁₄Asor was die vader van Sadok, Sadok van Agim, en Agim van Elihud; ₁₅Elihud was die vader van Eleasar, Eleasar van Mattan, en Mattan van Jakob; ₁₆Jakob was die vader van Josef, die man van Maria uit wie gebore is Jesus wat Christus genoem word.

₁₇Altesaam was daar dus veertien geslagte van Abraham af tot by Dawid, veertien van Dawid af tot by die Babiloniese ballingskap en veertien van die Babiloniese ballingskap af tot by Christus.

₁₈Hier volg nou die geskiedenis van die geboorte van Jesus Christus.

Toe sy moeder Maria nog aan Josef verloof was, het dit geblyk dat sy swanger is sonder dat hulle gemeenskap gehad het. Die swangerskap het van die Heilige Gees gekom. ₁₉Haar verloofde, Josef, wat aan die wet van Moses getrou was maar haar tog nie in die openbaar tot skande wou maak nie, het hom voorgeneem om die verlowing stilweg te verbreek. ₂₀Terwyl hy dit in gedagte gehad het, het daar 'n engel van die Here in 'n droom aan hom verskyn en gesê: “Josef seun van Dawid, moenie bang wees om met Maria te trou nie, want wat in haar verwek is, kom van die Heilige Gees. ₂₁Sy sal 'n Seun in die wêreld bring, en jy moet Hom Jesus noem, want dit is Hy wat sy volk van hulle sondes sal verlos.”

₂₂Dit het alles gebeur sodat die woord wat die Here deur sy profeet gesê het, vervul sou word:

Die naam beteken God by ons.

₂₄Toe Josef uit die slaap wakker word, het hy gemaak soos die engel van die Here hom beveel het en met haar getrou. ₂₅Hy het egter nie met haar omgang gehad voordat sy haar Seun in die wêreld gebring het nie. En Josef het Hom Jesus genoem.