'n Treurlied oor Tirus
1Die woord van die Here het tot my gekom: 2“Mens, jy moet 'n treurlied oor Tirus sing. 3Tirus lê aan die kus en dryf handel met die ander volke, met baie eilande. Jy moet vir Tirus sê: So sê die Here my God:
“Tirus, jy dink jou skoonheid is volmaak.
4Jou magsgebied strek tot oor die diepsee,
en dié wat jou gebou het, het jou 'n mooi skip gemaak.
5Hulle het jou twee kante gebou van sipresse uit Senir
en sederhout uit Libanon gebruik vir jou mas.
6Hulle het jou roeispane gemaak
van groot bome uit Basan,
jou dek van sipreshout uit die Kittiëreilande,
en dit ingelê met ivoor.
7Jou seile was van veelkleurige materiaal uit Egipte;
daaraan is jy uitgeken.
Pers en rooi wolstof uit die Elisa-eilande
het jou bedek.
8Inwoners van Sidon en Arwad was jou roeiers,
en jou bevare seemanne het jy self gelewer, Tirus.
9Leiers, vakmanne uit Gebal was aan boord
om jou lekplekke toe te stop.
Al die skepe op see met hulle bemannings
het na jou toe gekom om met jou handel te dryf.
10“Mense uit Paras, Lud en Put was soldate in jou leër.
Met die skilde en helms wat hulle in jou opgehang het,
het hulle jou aansien gegee.
11In jou leër op jou mure rondom was manne uit Arwad,
op jou torings mense uit Gammad.
Hulle het hulle skilde rondom teen jou mure opgehang
en jou skoonheid volmaak gemaak.
12“Tarsis het vir jou handel gedryf,
want jy het baie te verruil gehad;
hulle het jou handelsware verruil vir silwer,
yster, tin en lood.
13Griekeland, Tubal en Mesek was agente vir jou;
hulle het jou goedere verruil vir slawe en koperware.
14Uit Bet-Togarma het trekperde, ryperde en muile gekom
in ruil vir jou handelsware.
15Mense uit Dedan was agente vir jou,
baie eilande het in jou diens gestaan as handelaars;
hulle het vir jou olifantstande en ebbehout gebring as betaling.
16Aram het vir jou handel gedryf,
want jy het baie produkte gelewer;
hulle het jou handelsware verruil vir turkoois, pers wolstof,
veelkleurige materiaal, linne, koraal en robyne.
17“Juda en Israel was agente vir jou;
hulle het jou goedere verruil vir koring uit Minnit,
vir vye, heuning, olyfolie en balsemgom.
18Damaskus het vir jou handel gedryf,
want jy het baie produkte gelewer,
jy het baie te verruil gehad
vir wyn uit Gelbon en wol uit Sagar.
19Sowel Dan as Griekeland het goedere
uit Usal gelewer vir jou handelsware;
jy het bewerkte yster,
kaneel en kalmoes gekry vir jou goedere.
20“Dedan was jou agent vir saalkleedjies.
21Arabië en al die regeerders van Kedar
het in jou diens gestaan as handelaars;
hulle het vir jou handel gedryf
met lammers, skaapramme en bokramme.
22Die handelaars van Skeba en Rama was jou agente;
hulle het jou handelsware verruil vir die beste balsem,
vir allerhande edelstene en goud.
23Haran, Kanne, Eden, die handelaars van Skeba,
Assirië en Kilmad het vir jou as agente opgetree;
24hulle was jou agente,
hulle het mooi klere,
tjalies van blou wolstof,
veelkleurige materiaal,
tweekleurige materiaal,
gevlegte en gedraaide tou aan jou verhandel.
25Tarsisskepe het jou goedere op handelstogte vervoer.
“Jy het ryk geword en baie mag gekry op die diepsee;
26jou roeiers het jou op die groot waters gebring,
maar toe het die oostewind jou verpletter op die diepsee.
27Jou rykdom, jou handelsware, jou goedere,
jou seemanne, jou matrose,
die manne wat jou lekplekke moes toestop,
dié wat met jou goedere handel moes dryf
en al jou soldate, die hele menigte in jou,
het in die diepsee afgestort die dag toe jy vergaan het.
28Die geskreeu van jou matrose het die kuslande laat sidder;
29al die roeiers het hulle skepe verlaat;
die seemanne, al die matrose, het op land gaan staan.
30Hulle het geskreeu oor wat met jou gebeur het,
hulle het bitterlik gekerm;
hulle het stof op hulle koppe gegooi
en op die grond rondgerol;
31hulle het hulle koppe kaalgeskeer in rou oor jou en rouklere aangetrek;
hulle het bitterlik gehuil oor jou,
bitterlik getreur.
32Tussen hulle smartkrete deur
het hulle 'n treurlied begin sing,
'n treurlied oor jou:
‘Wie kon op see met Tirus vergelyk word?’
33“Wanneer jou handelsware aangekom het oor die see,
kon baie volke in oorvloed leef;
met jou groot rykdom, jou goedere,
het jy die konings van die aarde ryk gemaak.
34Maar nou is jou mag op see gebreek,
jou mag op die diep waters.
Jou handelsware en al jou mense
is daarmee heen saam met jou.
35Al die bewoners van die eilande
is skrikbevange oor wat met jou gebeur het;
hulle konings se hare rys,
hulle gesigte is wit van die skrik.
36Die handelaars onder die volke fluit van verbasing
oor wat met jou gebeur het.
Jy het 'n afskrikmiddel vir ander geword,
dit is vir altyd klaar met jou.”
