AMOS 8

Die tyd is ryp vir my volk Israel,

Ek sal hom nie meer spaar nie.

₃Daardie dag sal die sang in die paleis

'n gehuil word, sê die Here my God.

Daar sal baie lyke wees, oral neergegooi.

Bly liewer stil!

₄Luister hierna, julle wat arm mense vertrap,

julle wat die mense in nood in die land wil uitroei.

₅Julle sê: “Wanneer is Nuwemaan verby

dat ons koring kan verkoop,

of Sabbat, dat ons ons graanwinkels weer kan oopmaak

en minder graan vir meer geld kan verkoop?

Ons laat die skaal mos kul soos ons wil!”

₆Julle verkoop arm mense vir geld,

behoeftiges oor 'n paar sandale,

julle verkoop selfs die koringkaf.

₇Die Here het 'n eed afgelê by Homself,

by Hom wat die trots van Jakob moes gewees het:

Ek sal nooit vergeet wat hulle gedoen het nie!

₈Sal die aarde nie hieroor beef nie,

sal sy bewoners nie treur nie!

Sal die hele wêreld nie in beroering kom soos die Nyl,

wegsak soos die rivier van Egipte nie!

₉Daardie dag, sê die Here my God,

laat Ek die son helder oordag ondergaan,

maak Ek dit donker op aarde terwyl dit nog ligdag is;

₁₀Ek verander julle feeste in treurgeleenthede,

julle liedere in klaagsange;

Ek trek vir julle rouklere aan

en skeer al julle koppe kaal;

Ek laat dit word soos wanneer 'n mens oor 'n enigste kind treur,

julle uiteinde sal vir julle 'n bitter dag wees.

₁₁Maar daar kom dae, sê die Here my God,

dat Ek 'n honger oor die aarde laat kom:

'n honger nie na kos nie, 'n dors nie na water nie,

maar om die woorde van die Here te hoor.

₁₂Die mense sal ronddwaal van see tot see,

rondslinger van noord tot oos

om die woord van die Here te soek,

maar hulle sal dit nie kry nie.

₁₃Daardie dag sal die mooi meisies

en die jongmanne van dors beswyk,

₁₄dié jongmense wat ede aflê by wat Samaria se sonde is

en sê: “So seker as jou god leef, Dan,

so seker as daar 'n pelgrimspad na Berseba toe is!”

Hulle sal val en nie weer opstaan nie.